Baucau, 05/10/2022, Ekipa Bee Timor-Leste, Empreza Públika (BTL, E.P), kompostu hosi Tékniku Operadór (T.O) Operasionál no Manutensaun (O&M) hamutuk ho traballadór Mão de Obra, munisípiu Baucau fahe ba grupu rua, hodi hala’o servisu, grupu ida halo manutensaun ou normalizasaun ba kanu distribuisaun bee 3” ne’ebé intupidu, iha área Uato-Lete Villa Nova, munisípiu Baucau.
Koordenadora BTL, E.P munisípiu Baucau informa, tékniku sira identifika katak, kanu distribuiaun bee ne’ebé intupidu ne’e, deskonfia iha komunidade balun halo ou fura ku’ak, hodi sulan hena ka plástiku ba kanu laran, nune’e ikus mai hamosu intupidu, hodi difikulta fornesimentu bee ba komunidade sira ne’ebé asesu bee hosi liña distribuisaun refere.
Koordenadora hatete, hafoin tékniku sira identifika instupidu ne’e, ekipa konjunta ne’e mobiliza materiál hodi halo manutensaun ou hodi normaliza intupidu ne’e, nune’e bele garante distribuisaun bee ba komunidade sira, iha área ne’e.
Daudaun ne’e tékniku no traballadór sira iha hela terrenu hala’o servisu, hodi hasai fo’er iha kanu refere, hafoin finaliza mak foin bele fornese hikas bee ba komunidade sira, iha fatin ne’e.
Alende ne’e, tékniku BTL, E.P ho traballadór Mão de Obra hosi grupu ida seluk, kontinua hamoos tanke kaptasaun Uailia no aredór sira.
Fahe ba Sosial Media:
