Díli, 31/10/2022, Ekipa téknika hosi Diresaun Enjeñaria no Investimentu (D.E.I) Bee Timor-Leste, Empreza Públika (BTL, E.P) Nasionál akompaña hosi Koordenadór BTL, E.P munisípiu Bobonaro ho tékniku sira, inklui Fasilitadór postu-administrativu Bobonaro Villa, halo levantamentu tékniku ba sistema bee moos, iha postu-administrativu Bobonaro Villa, munisípiu Bobonaro.
Atividade levantamentu dadus ne’e, hala’o durante loron lima (5), hahú hosi loron 25 to’o 29 fulan outubru tinan 2022 ne’e, ho objetivu hodi halo melloramentu ba sistema bee moos tuan sira ou sistema bee ne’ebé antes ne’e eziste ona hanesan tanke, kanu transmisaun no distribuisaun inklui BPT. Alende ne’e, BTL, E.P mos planeia ona, atu transforma sistema refere ba urbana, hodi instala metru kontadór ba uma kain ida-idak, iha postu-administrativu Bobonaro Villa.
Durante iha atividade survey ne’e, Fasilitadór postu-administrativu Bobonaro Villa hatudu mos sistema ezistente sira nomos booster pump balun ba tékniku BTL, E.P inklui bee matan rua hanesan Ilmoku no Ilsai ne’ebé lokaliza iha área Tapo, munisípiu Bobonaro.
Molok tékniku sira tun ba terrenu hodi halo survey, antes ne’e, BTL, E.P munisípiu Bobonaro koordena uluk ona ho autoridade lokál sira iha postu refere, kona-bá prezensa ekipa BTL, E.P nian, iha munisípiu ne’e rasik no lideransa lokál sira mos koopera, hodi hala’o atividade ne’e iha sira nia munisípiu.
Fahe ba Sosial Media:
