Viqueque, 01/06/2023. Ekipa nasionál hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P), akompaña hosi Koordenadór BTL, E.P munisípiu Viqueque nomos tékniku SMASA, halo levantamentu dadus tékniku ba sistema bee moos, iha Postu-administrativu Uatulari, munisípiu Viqueque.
Molok tun ba terrenu, ekipa BTL, E.P nasionál no munisípiu Viqueque inklui tékniku SMASA, hala’o uluk enkontru ho autoridade lokál sira, hodi koordena no esplika objetivu prezensa BTL, E.P nian iha fatin ne’e nomos prosesu tomak hosi atividade refere no autoridade lokál sira mos koopera di’ak. Hafoin remata enkontru ne’e, lideransa komunitária tolu no komunidade balun ne’ebé hela besik iha bee matan ne’e, akompaña ekipa BTL, E.P no SMASA hodi kontinua halo levantamentu dadus iha terrenu.
Atividade levantamentu dadus tékniku ne'e, hala’o durante loron tolu, hahú hosi loron 29 to'o 31 fulan maiu tinan ne'e, ho objetivu hodi hatene dadus kompletu komunidade nian nomos identifika rekursu bee ho ninia débitu, katak bee ne’e bele kobre ba populasaun sira hotu iha postu-administrativu Uatulari ou lae. Hafoin levantamentu, enjeñeiru DEI sei halo análize no prepara dezeñu nomos BoQ.
Tuir rezultadu levantamentu dadus tékniku katak, bee matan Ulu-Ira/Uai-Ua ne’ebé lokaliza iha Ossu ho débitu 20 lps. Ho nune’e bee refere bele kobre ba populasaun sira iha Uatulari. Tanba ne’e, parte autoridade no na’in ba bee matan ne’e konkorda ona, atu bele utiliza bee matan Ulu-Ira/Uai-Ua hodi kanaliza bee ba postu-administrativu Uatulari ne’ebé ho nia distánsia kilómetru 15 (15km). Enkuantu projetu bee moos ne’e, ho sistema gravitasaun no sei transforma ba sistema urbana, iha ne’ebé sei monta mos metru kontadór ba benefiáriu sira.
Daudaun ne’e tékniku/enjeñeiru hosi DEI prepara hela dezeñu no BoQ, hodi hakat ba prosesu tenderizasaun.
Enkuantu planu projetu sistema bee moos ne’e, sei benefisia ba komunidade sira ne’ebé hela iha suku neen, aldeia 62, iha postu-administrativu Uatulari, ho totál populasaun 24.391 no uma kain 5895.
Fahe ba Sosial Media:
