Dili, 25/11/2022, Ekipa Tékknika Aprovizionamentu hamutuk ho Tékniku hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P) hala’o prebid meeting ho kompañia sira, kona-bá projetu Supply & Installation of Prefabricated Liner Tanks ba iha postu-administrativu Lacluta, munisípiu Viqueque no suku Cribas, postu-administrativu Manatuto Villa, munisípiu Manatuto.
Prebid meeting ne’e, hodi ko’alia kona-bá kontinuasaun hosi siste visit no faze ou prosesu sira tuir mai relasiona ho projetu Supply & Installation of Prefabricated Liner Tanks ne’ebé sei implementa iha postu-administrativu Lacluta no suku Cribas.
Atividade site visit no prebid meeting ne’e, hanesan mandatória ida iha dokumentu konkursu ba projetu konstrusaun no melloramentu sira no prosesu tuir mai molok implementa projetu hirak ne’e.
Sistema bee ne’ebé sei implementa iha postu-administrativu Lacluta ne’e, sei transforma ba sistema urbana, ne’ebé sei instala mos metru kontadór ba uma kain ida-idak nomos sei instala rezervatóriu rua ne’ebé ho nia kapasidade la hanesan, ida ho kapasidade metru kúbiku 420 (420m3) no ida seluk 40 (40m3), hodi akumula bee, nune’e bele fornese fila-fali bee ba abitante sira iha suku Dilór no Laline, inklui fornese mos bee ba igreja, postu eskuadra polísia Lacluta, eskola, postu saúde no edifísiu administrasaun P.A Lacluta. Enkuantu suku Laline nian, komunidade sira ne’ebé hela iha parte Lacluta Villa mak sei asesu ba sistema refere.
Enkuantu sistema bee suku Cribas nian, sei transforma mos ba sistema urbana, hodi monta metru kontadór ba uma kain sira iha suku refere no sei instala mos rezervatóriu ida ho nia kapasidade metru kúbiku 155 (155m3) no sistema bee ne’e sei benefisia ba komunidade aldeia lima (5) ne’ebé hola parte iha suku Cribas, inklui sei fornese mos bee ba fasilidade públika sira hanesan eskola, postu súde no igreja.
Fahe ba Sosial Media:
