Díli, 19 Fevereiru 2026. Diretór DEI BTL, E.P, João da Cruz Cardoso, akompaña hosi Jestór Infraestrutura no RP&GIS ho ekipa hamutuk ho Enjeñeiru MOP, PMU inklui kompañia implementadór Karya Timor Lda enkontru ho Adjunta 𝐺𝑒𝑛𝑒𝑟𝑎𝑙 𝑀𝑎𝑛𝑎𝑔𝑒𝑟 BNU Timor ho ekipa, iha sala reuniaun BNU, Colmera.
Sorumutu ne'e, hodi koordena kona-bá projetu implementasaun kanál drenajen D4 nian, liu-liu faze dahaat no dalimak nian, ne'ebé sei afeta ba edifísiu BNU Timor.
Durante iha reuniaun ne'e, BNU Timor husu ba kompañia kontratór, atu asegura edifísiu, nune'e labele fó impaktu negativu ba edifísiu BNU nomos nafatin fó espasu no seguransa ba funsionáriu no kliente sira ne'ebé atu asesu bá banku ne'e.
Relasiona ho preokupasaun no pedidu ne'e, parte BTL, E.P hatete sei halo koordenasaun ho entidade relevante sira inklui operadór telekomunikasaun tolu hanesan Telemor, Timor Telecom no Telkomcel, atu nune'e labele afeta ba rede komunikasaun nian inklui EDTL, E.P hodi asegura liña eletrisidade ba Banku ne'e.
Atu evita risku ba edifísiu refere, ekipa BTL, E.P ho BNU Timor sei marka ajenda reuniaun téknika iha tempu besik, hodi bele deskute kle'an liu tan kona-bá estrutura edifísiu BNU Timor nian, molok hakat ba servisu eskavasaun segimentu 4 & 5.
Fahe ba Sosial Media:
