Díli, 11/06/2025. Diretór Enjeñaria no Investimentu (DEI) Bee Timor-Leste, Empreza Públika (BTL, E.P), João Cardoso akompaña hosi Jestór RP no GIS ho Tékniku hala’o enkontru ho ekipa SEEAS no DNRAS, iha sala reuniaun SEEAS, Caicoli.
Reuniaun ne'e, hodi ko’alia kona-bá kestaun bee moos ba postu-administrativu (PA) Tilomar no Maucatar liu-liu suku Ogues, nune’e hodi buka alternativa atu bele solusiona problema bee moos ne’ebé komunidade sira enfrenta iha PA Tilomar no suku Ogues.
Durante iha sorumutu ne’e, BTL, E.P aprezenta mos planu konstrusaun sistema bee moos ba PA Tilomar nian ne’ebé oras ne’e preparadu ona no sistema refere sei kobre ba suku Maudemo, Casabauc no aldeia balun hosi suku Lalawa no Beiseuc.
Enkuantu liga ba suku Ogues nian, BTL, E.P informa katak, suku referida inklui ona iha sistema bee hemu nian (água potavel) ne’ebé daudaun ne’e iha ona prosesu preparasaun DED.
Hafoin aprezentasaun, parte SEEAS husu ba BTL, E.P atu halo intervensaun imediata ou kurtu prazu nian, hodi responde ba komunidade sira-nia preokupasaun kona-bá bee, nune’e hodi hein planu projetu konstrusaun sistema bee moos ba longu prazu nian, ne’ebé oras ne’e iha hela faze DED.
Hatan ba rekomendasaun ne’e, Diretór DEI hatete, ekipa téknika sei hato’o asuntu ne’e ba Ezekutivu BTL, E.P nian, atu bele foti desizaun ligadu ho intervensaun imediata ba PA Tilomar no suku Ogues nian
Fahe ba Sosial Media:
