Lautém, 26/10/2022, Koordenadór Bee Timor-Leste, Empreza Públika (BTL, E.P) hetan vizita hosi Xefe suku Muapitine, hodi enkontru mos ho BTL, E.P, iha edifísiu BTL, E.P, postu-administrativu Lospalos, munisípiu Lautém.
Vizita ne’e ho objetivu, hodi hato’o problema sistema bee moos ne’ebé avaria, iha aldeia Malahara, suku Muapitine, Lospalos.
Durante enkontru, xefe suku informa mos ba BTL, E.P katak, ho sistema bee ne’ebé avaria ne’e, afeta tebes uma kain 120 mak labele asesu ba bee moos.
Hafoin hetan informasaun hosi autoridade lokál ne’e, Koordenadór BTL, E.P munisípiu Lautém rejista no orienta kedas tékniku operadór sira, hodi dezloka kedas ba terrenu, nune’e bele halo identifikasaun ba problema refere.
Tuir informasaun hosi BTL, E.P munisípiu Lautém katak, tékniku sira identifika bomba ne’ebé durante ne’e produz bee, hodi fornese ba komsumidór sira ne’e, aat ou avaria totalmente. Nune’e BTL, E.P Lautém prepara ona proposta hodi submete mai BTL, E.P nasionál, atu bele prepara materiál hodi bele rezolve kestaun sistema bee moos iha Malahara, hodi garante fornesimentu bee ba komunidade sira.
Koordenadór BTL, E.P Lautém informa, iha loron hanesantékniku operadór hamutuk ho traballadór mão de obra kontinua halo instalasaun metru kontadór unidade hitu, ba komunidade uma kain hitu, ne’eb’e antes ne’e rejista no halo ona pagamentu iha balkaun edifísiu BTL, E.P Lautém. Nune’e ho instalasaun metru kontadór bee ba kliente sira nia hela fatin ne’e, hodi hafasil halo kontrolu ba nesedidade uzu bee kada loron.
Fahe ba Sosial Media:
