Díli, 07/02/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis, hamutuk ho I Vise-Prezidente K.E BTL, E.P no II Vise-Prezidente K.E BTL, E.P, enkontru ho Konsultór hosi ADB kona-bá sistema integradu ho naran Information Management System (IMS) - Enterprise Resource Planning (ERP) ne’ebé koñesidu ho naran NetSuite, enkontru ne’e rasik, realiza iha sala reuniaun Ezekutivu, edifísiu sentrál BTL, E.P, Caicoli, Díli.
Objetivu hosi enkontru ne’e, hodi atualiza sistema integradu ho naran Information Management System (IMS) - Enterprise Resource Planning (ERP)-NetSuite ne’ebé antes ne’e estabelese no lansa ona iha BTL, E.P, hodi fasilita servisu sira ne’ebé eziste iha BTL, E.P, tanba ne’e atu haree no hatene funsionamentu ou utilizasaun hosi sistema ne’e rasik katak, informasaun sira ne’ebé tau ou pasa iha sistema ne’e, iha ona serteza katak bele la’o ho di’ak liuhosi utilizasaun sistema refere.
Enkuantu Sistema NetSuite hanesan aplikativu konjuntu ou módulu integradu ida, hodi halo jestaun ba prosesu prinsipál hosi negósiu, finansas no kontabilidade, rekursu umanu, aprovizionamentu, GIS, Billing System, Meter Reading no seluk tan, katak sistema informasaun ne’ebé interligadu dadus hotu no prosesu ba sistema ida. Tanba ne’e, BTL, E.P hakarak uza sistema NetSuite ne’e, hodi fasilita servisu ho di’ak, efisiente no efetivu, nune’e bele minimiza burokrasia no iha transparánsia.
Alende hodi ko’alia no haree kona-bá sistema IMS- ERP-NetSuite, Konsultór ADB ida seluk mos sei servisu hamutuk ho parte Diresaun Operasionál no Manutensaun nian, hodi hadi’a sira nia servisu ho di’ak.
Fahe ba Sosial Media:
