Díli, 19/07/2023. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo da Cruz, akompaña hosi Diretór Admnistrasaun no Finansas, Sr. Sidónio Freitas no Diretór Operasionál no Manutensaun Sr. Aleixo dos Santos, enkontru ho parseiru Unicef Timor-Leste, iha sala reuniaun Ezekutivu, edifísiu sentrál BTL, E.P, Caicoli, Díli.
Enkontru ne’e, hodi atualiza progresu servisu ne’ebé realiza ona, liuhosi kooperasaun BTL, E.P ho Unicef TL ligadu ho reativa Grupu Maneja Fasilidade-GMF iha munisípiu Ainaro no Ermera no atividade refere implementa no finaliza ona. No iha tempu hanesan, liuhosi reuniaun ne’e, parte rua mos (BTL, E.P & Unicef TL) halo koordenasaun, atu hakat ba apoia tuir mai kona-bá reabilitasaun ba sistema bee mos, iha fatin ne’ebé identifikadu ona, iha munisípiu rua hanesan Ainaro no Ermera. Ohin, BTL, E.P rasik promete sei aselera prosesu hirak ne’e, atu nune’e bele finaliza lalais projetu refere iha tempu badak, nune’e wainhira sistema hirak ne’e finaliza ona, mak sei entrega ba GMF hodi jere rasik.
Iha reuniaun ne’e, BTL, E.P apresia no agradese ba apoia hosi parseiru Unicef TL nian. BTL, E.P nafatin kria kooperasaun ne’ebé di’ak ho Unicef, hodi haree sistema bee no saneamentu, iha área rurál sira.
Durante iha sorumutu ne’e, parseiru Unicef mos apresia tebes ho servisu sira ne’e no sira nafatin apoia iha setór bee, liu-liu bee no saneamentu iha suku sira.
Alende ne’e, parte rua destaka mos planu atividade ba tinan 2023-2024 nian, ne’ebé sei nafatin implementa iha munisípiu rua (Ainaro no Viqueque). Atividade hirak ne’e, hanesan assessment ba ambiente nian, treinamentu ba GMF no implementasaun obra fíziku sira.
Fahe ba Sosial Media:
