Díli, 17/11/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis hamutuk ho I Vise-Prezidente K.E BTL, E.P, Sr Gustavo da Cruz, akompaña hosi Jestór no Jestora sira hosi Departamentu PAM, IT, DAF, RH, DEI, Jurídiku/Legál no DAK hala’o enkontru ho ekipa ADB Consultant expert ba IMS-ERP no Design Software TEQsuite, kona-bá sistema integradu ho naran Information Management System (IMS) - Enterprise Resource Planning (ERP) enkontru ne’e rasik, realiza iha sala reuniaun Ezekutivu, edifísiu sentrál BTL, E.P, Caicoli, Díli.
Objetivu hosi enkontru ne’e, hodi ko’alia kle’an liu tan iha parte relasaun dadus no prosesu hodi produz informasaun iha sistema ne’ebé tama ona iha fase dezeñu, atu nune’e, parte hot-hotu hanesan BTL, E.P, hosi TEQSuite no ADB bele haree hamutuk kona-bá utilizasaun sistema ne’e rasik no parte ne’ebé mak presiza hadi’a ou halo mudansa iha sistema refere, hodi hetan sistema ne’ebé di’ak no bele ajuda ba servisu ne’ebé efisiente no efetivu ho resultadu bele minimiza burokrasia no hamosu ou iha transparánsia.
Durante iha enkontru ne’e, programmer TEQSuite halo mos aprezentasaun kona-bá maneira utilizasaun hosi sistema ne’e rasik no parte BTL, E.P mos hato’o sujestaun balun ligadu ho aprezentasaun refere. Alende ne’e, ekipa dezeñadór TEQSuite mos hatudu ou demonstra oinsá prosesu hatama dadus ba iha sistema ne’e rasik no nia prosesu kontinuasaun hosi utilizasaun no vantajen hosi sistema ne’e.
Hafoin esplikasaun hosi ekipa dezeñadór TEQSuite ne’ebé kria software ne’e, Ezekutivu BTL, E.P konsidera sistema ida ne’e di’ak, hodi hala’o servisu sira iha empreza ne’e, tamba bele hamosu tranparénsia iha empreza públika ne’e, liu-liu hanesan utilizasaun sasan no orsamentu Estadu nian.
Sistema IMS-ERP hanesan aplikativu konjuntu ou módulu integradu ida, hodi halo jestaun ba prosesu prinsipál hosi negósiu, finansas no kontabilidade, rekursu umanu, procurement no seluk tan, katak sistema informasaun ne’ebé interligadu dadus hotu no prosesu ba sistema ida.
Entretantu sistema refere, iha futuru sei fó benefisia ou impaktu pozitivu ba BTL, E.P, tamba bele hatudu transparénsia. Enkuantu daudaun ne’e iha ona faze dezeñu no ohin demonstra ona ba BTL, E.P, tuir planu tinan oin bele utiliza ona sistema ne’e rasik.
Fahe ba Sosial Media:
