Bobonaro, 02/12/2025. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, José Filipe Ximenes Smith hamutuk ho Ofisiál Legál ho ekipa DAK BTL, E.P akompaña hosi Koordenadór BTL, E.P Munisípiu Bobonaro disemina informasaun ne'ebé abrigu iha Dekretu Lei no Diploma Ministeriál, kona-bá knaar BTL, E.P nian, tabela tarifária no regulamentu sira seluk, ba abitante sira, iha aldeia Raimean, suku Opa, Postu-administrativu Lolotoe Vila, Munisípiu Bobonaro
Ekipa BTL, E.P sosializa Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Realizasaun atividade sosializasaun ne’e, hodi partilla uluk informasaun kona-bá regulamentu hotu ba konsumidór sira, hodi hein projetu kanalizasaun bee iha PA Lolotoe Vila finaliza. Nune’e wainhira obra fíziku remata, komunidade sira bele kompreende no kolabora oinsá atu kontribui selu tarifa bee mensalmente nomos bele tau matan ba fasilidade bee ne'e.
Durante iha atividade sosializasaun ne’e, komunidade sira hato’o sira-nia preokupasaun kona-bá problema bee moos, rekomendasaun no susjestaun balun, BTL, E.P anota no sei halo intervensaun, nune’e hodi responde ba kestaun hirak ne’e.
Partisipa iha atividade sosializasaun ne’e mak Administradór Postu-adminitrativu Lolotoe, PNTL, Lideransa Komunitária no abitante sira.
Fahe ba Sosial Media:
