Díli, 16/08/2024. Diretór Operasasaun no Manutensaun (DOM) ho Diretór Administrasaun no Finansas (DAF) Bee Timor-Leste, Empreza Públika (BTL, E.P), hamutuk ho parte Legál, Jestór DAK ho ekipa inklui parseiru JICA no DNRAS disemina informasaun kona-bá Dekretu Lei no Diploma Ministeriál BTL, E.P nian, ba abitante aldeia Mate Resto no Mate Moris, iha suku Villa-Verde, postu-administrasaun Vera Cruz, munisípiu Díli.
Ekipa BTL, E.P halo sosializasaun kona-bá Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Objetivu hosi atividade diseminasaun ne’e, hodi partilla informasaun kona-bá, regulamentu hotu ba konsumidór sira ne'ebé sei sai kliente BTl, E.P, atu sira bele hatene regras, nune’e sira labele viola dekretu lei no diploma ministeriál ne’ebé mak eziste ona, liu-liu kona-bá proibisaun halo koneksaun bee ho dalan ilegál ba sistema sira, tau matan ba sistema ne’ebé instala ona nomos oinsá atu bele selu tarifa bee moos nian, molok halo kanalizasaun ba uma kain sira.
Durante iha atividade sosializasaun ne’e, parte BTL, E.P husu ba abitante sira atu kuida rekursu bee no kanu sira ne’ebé sei instala iha suku refere, labele halo koneksaun ilegál diretamente ba kanu transmisaun no distribuisaun sira, labele estraga sistema bee sira. Alen de ne’e, husu mos ba abitante sira atu utiliza bee ho konsiénsia, tanba iha aldeia rua ne’e, jeografikamente komunidade balun hela iha foho leten liu no balun hela iha kraik, nune’e hodi afeta ba fornesimentu bee moos. Tanba ne’e, ba konsumidór sira ne’ebé uza ona bee, tenke taka, atu nune’e konsumidór sira mos seluk bele asesu bee hanesan.
Reprezentante Administradór Postu-Administrativu Vera Cruz hatete, kanalizasaun bee ne’e liuhosi prosesu ne’ebé naruk, tanba ne’e, wainhira kanalizasaun bee to’o ona iha ida-idak nia fatin, tenke utiliza bee ho di’ak, atu ema hotu bele hetan bee hanesan nomos tenke kuida no labele estraga infraestrutura sira, wainhira bele la sai, tenke bá hato’o iha BTL, E.P, atu nune’e sira bele halo intervensaun.
Iha okaziaun ne’e, abitante sira hato’o mos sira nia preokupasaun kona-bá problema falta bee moos, maibé sira agradese tanba iha tempu besik bele asesu ona bee hosi sistema BTL, E.P nian, ho nune’e sira sei koopera hodi rejista no prontu atu kontribui reseitas ba Estadu, liuhosi selu tarifa bee moos, maibé sira husu ba BTL, E.P atu mantein halo kontrolu no operasaun ba sistema sira ne’e ho regularmente, ho nune’e sira labele halerik tan ba bee moos.
Hafoin sosializasaun ne’e, iha tempu badak, ekipa BTL, E.P sei tun hikas ba terrenu hodi fasilita abitante sira atu rejista ba ligasaun foun, molok halo kanalizasaun bee ba uma. Enkuantu númeru uma kain ne’ebé sei asesu sistema bomba ne’e, besik 500, kompostu hosi aldeia Mate Resto ho totál uma kain 209 no aldeia Mate Moris hamutuk 289.
Partisipa iha atividade sosializasaun ne’e mak Reprezentante Administradór Postu-Administrativu Vera Cruz, Xefe suku Villa-Verde, Xefe Aldeia nomos komunidade hosi aldeia Mate Resto no Mate Moris, suku Villa-Verde.
Fahe ba Sosial Media:
