Baucau, 17/02/2024. Iha loron 16 fulan ne'e, Diretór Operasasaun no Manutensaun (DOM) Bee Timor-Leste, Empreza Públika (BTL, E.P), hamutuk ho parte Legál, Jestór DAK nomos Koordenadora munisípiu Baucau disemina informasaun kona-bá Dekretu Lei no Diploma Ministeriál BTL, E.P nian, ba abitante sira, iha postu-administrasaun Vemasse, munisípiu Baucau. Atividade sosializasaun ne'ebé realiza iha nível postu-administrativu ne'e ba dahuluk, hafoin kanalizasaun bee moos iha postu refere finaliza no inaugura.
Ekipa BTL, E.P halo sosializasaun kona-bá Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Objetivu hosi atividade diseminasaun ne’e, hodi partilla informasaun kona-bá, regulamentu hotu ba konsumidór sira ne'ebé sai ona kliente BTl, E.P, atu sira bele hatene regras, nune’e sira labele viola dekretu lei no diploma ministeriál ne’ebé mak eziste ona no sita kona-bá proibisaun halo koneksaun bee ho ilegalmente ba sistema sira, tau matan ba sistema ne’ebé instala ona nomos oinsá atu bele selu tarifa bee moos nian, hafoin sira asesu ona bee hosi BTL, E.P.
Abitante sira ne’ebé partisipa iha sosializasaun ne’e, mak benefisiáriu sira ne'ebé foin asesu kanalizasaun bee moos hosi BTL, EP inklui instala ona metru kontadór ba uma kain ida-idak nia hela fatin. No sira koopera no prontu hodi kontribui reseitas ba Estadu, liuhosi selu tarifa bee moos.
Partisipa iha atividade sosializasaun ne’e mak administradora postu-Administrativu Vemasse, parte PNTL, Xefe suku no xefe aldeia, komunidade Vemasse no estudante balun.
Fahe ba Sosial Media:
