Ermera, 20/02/2025, Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith, Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Korporativu, Sr. Manuel Tomás Amaral de Carvalho, akompaña hosi Diretór Diresaun Enjeñaria no Investimentu (DEI), Jestór Infraestrutura, Enjiñeiru, Koordenadór Munisípiu Ermera ho ekipa disemina informasaun ba autoridade lokál no komunidade sira, iha Postu Administrativu Railaco Villa, munisípiu Ermera.
Atividade sosializasaun ne’e, hodi informa ba autoridade lokál, lideransa komunitária no abitante sira, liga ba BTL, E.P nia planu atu implementa projetu melloramentu sistema bee moos iha postu-administrativu Railaco Villa. Liuhosi hosi atividade ne’e, hodi rona direta preokupasaun no sujestaun sira, nune’e bele hetan konkordánsia no apoia hosi autoridade lokál no komunidade sira, molok hakat ba faze implementasaun nian.
Vise-Prezidente KE BTL, E.P ba Asuntu Tékniku, Sr. José Filipe Ximenes Smith husu ba autoridade lokál no komunidade Railaco Villa, atu labele hamosu problema sosiál sira hanesan kestaun kulturál no impedimentu, wainhira implementasaun projetu fíziku iha terrenu. Tanba wainhira iha intervensaun hosi komunidade, projetu la’o tarde no povu mak sei kontinua halerik ba moos.
Durante iha atividade diseminasaun ne’e, Vise-Prezidente KE BTL, E.P ba Asuntu Tékniku hatete BTL, E.P nia misaun mak atu lori bee ho kualidade ba populsaun sira iha terriróriu nasionál, tanba ne’e, BTL, E.P husu autoridade lokál no lideransa komunitária suku sia ne’ebé eziste iha Railaco Villa, atu tau forsa hamutuk fó liman ba malu, hodi apoia BTL, E.P nia programa, wainhira implementa iha postu-administrativu refere.
Ezekutivu BTL, E.P ne’e hatete, wainhira implementasaun la’o ona iha terrenu, autoridade lokál no lideransa suku sira mak sei hamrik iha liña oin, hodi fó protesaun, seguransa no vizilánsia ba kompañia ne’ebé mak sei kaer obra ne’e no BTL, E.P sei halo mos kontrolu ba servisu ne’e
Vise-Prezidente KE BTL, E.P ba Asuntu Korporativu, Sr. Manuel Tomás Amaral de Carvalho informa, BTL, E.P sei implementa projetu melloramentu sistema bee, tanba ne’e husu ba xefe suku no xefe aldeia sira ne’ebé partisipa iha sosializasaun ne’e, atu hato’o hikas informsaun hirak ne’e ba lideransa komunitária sira ne’ebé ohin la marka prezensa iha atividade refere, atu nune’e sira mos apoia ba programa ida ne’e, tanba implementasaun programa ne’e di’ak no melloramentu sistema bee ne’e sei transforma ba sistema urbana.
Vise-Prezidente KE BTL, E.P ba Asuntu Korporativu informa, melloramentu sistema bee ne’e sei kanaliza bee hakbesik ba populaaun sira, nune’e sei benefisia ba uma kain 300 ho nia populasaun 1.800 no BTL, E.P mos sei monta sistema bee (metru kontadór), atu bele aplika tarifa bee ba komunidade sira, tuir padraun ne’ebé iha ho presu ne’ebé kiik.
Durante iha sosializasaun ne’e, lideransa komunitária no abitante sira apresia no hato’o mos sira-nia preokupasaun nomos sujestaun balun ligadu ho planu ba implementasaun projetu sistema bee moos iha Railaco Villa. Alen de ne’e, sira konkorda no prontu atu kontribui selu tarifa bee, maibé servisu distribuisaun bee tenke regulár.
Komandante PNTL Eskuadra PA Railaco Villa agradese ba BTL, E.P tanba bele espande ona instalasaun BTL, E.P mai iha postu Railaco, hanesan área urbana ida nomos parte seguransa (PNTL) prontu atu kolabora iha kualker momentu, hodi asegura servisu tomak ne’ebé sei implementa iha postu refere.
Molok termina sosializasaun ne’e, autoridade PA Railaco liuhosi nia reprezentante, xefe suku no xefe aldeia sira asina akta konkordánsia, hatudu katak sira konkorda no sei fó apoiu máximu ba projetu sistema bee ne’ebé sei implementa iha PA Railaco Villa.
Tuir planu BTL, E.P sei implementa projetu melloramentu sistema bee moos iha postu-administrativu Railaco Villa, nune’e wainhira finaliza sei benefisia ba uma kain 300 ho nia populasaun 1.800 no sei fornese mos bee instituisaun sira hanesan postu-saúde, dormitóriu igreja no eskola.
Fahe ba Sosial Media:
