Manatuto, 06/12/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith, akompaña hosi Diretór Operasasaun no Manutensaun (DOM) ho Jestór DAK, Ofisiál Legál, Koordenadór BTL, E.P munisípiu Manatuto hamutuk ho Xefe Gabinete SEEAS disemina informasaun kona-bá Dekretu Lei no Diploma Ministeriál BTL, E.P nian, ba abitante suku Cribas, postu-administrativu Manatuto, munisípiu Manatuto.
Ekipa BTL, E.P halo sosializasaun kona-bá Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Objetivu hosi atividade diseminasaun ne’e, hodi partilla informasaun kona-bá, ezisténsia no papel BTL, E.P nian, regulamentu hotu ba konsumidór sira ne'ebé sei sai kliente BTL, E.P, atu sira bele hatene regras, nune’e sira labele viola dekretu lei no diploma ministeriál ne’ebé mak eziste ona, liu-liu kona-bá proibisaun halo koneksaun bee ho dalan ilegál ba sistema sira, tau matan ba sistema ne’ebé instala ona nomos oinsá atu bele selu tarifa bee moos nian, molok halo kanalizasaun ba uma sira.
Vise-Prezidente KE BTL, E.P ba Asuntu Tékniku husu ba Autoridade postu, lideransa suku no aldeia nomos KPK inklui populasaun sira, atu tau matan ba sistema bee ne’ebé BTL, E.P instala ona iha suku Cribas. Tanba populasaun suku Cribas mak uza no sai na’in sistema bee ne’e. Alen de ne’e, presiza mos kontribuisaun hosi komunidade suku Cribas, nune’e bele garante nafatin funsionamentu sistema bee ne’e.
Vise-Prezidente KE BTL, E.P ba Asuntu Tékniku akresenta, parte BTL, E.P anota no sei buka alternativa hodi responde ba preokupsaun hirak ne’ebé populasaun sira hato’o.
Iha biban ne’e, Administradór Postu-administrativu Manatuto Villa hatete, atu garante nia funsionalidade sistema bee, komunidade sira tenke hodi selu tarifa bee, tanba bee hosi perfurasaun ne’e presiza enerjia, tanba ne’e, presiza kontribuisaun hosi komunidade sira.
Xefe Gabinete SEEAS informa, sensibilizasaun ne’e importante tebes, tanba bele esplika regras ba komunidade sira nomos oinsá kontribuisaun hosi komunidade sira, hodi mellora sistema bee ne’e.
Komandante PNTL Munisípiu Manatuto hatete, tau matan ba sistema bee ne’e inportante tebes, tanba ne’e, husu ba populasaun sira atu kontribui liuhosi sira-nia dever hodi kuida fasilidade públiku sira, tanba Estadu nia dever hodi lori ona bee hakbesik ba komunidade sira-nia leet no komunidade sira mos hetan ona sira-nia direitu ba asesu bee, tanba ne’e, sira mos tenke kumpri sira-nia dever hodi tau matan ba sistema bee sira.
Xefe suku Cribas husu ba populasaun sira ne’ebé partisipa iha sosializasaun ne’e, atu rona no intende ho didi’ak, nune’e fahe mos informasaun ba komunidade sira seluk. Tanba ne’e wainhira iha dúvidas tenke husu klaru, liu-liu kona-bá prosesu pagamentu nian.
Partisipa iha atividade sosializasaun ne’e mak Administradór Postu-administrativu Manatuto Villa, Komandante PNTL Munisípiu Manatuto, xefe suku Sau, Ailili, Ma’abat, Aiteas, no Cribas nomos xefe aldeia sira, SMASA, PNDS no komunidade hosi suku Cribas.
Fahe ba Sosial Media:
