Liquiça, 23/04/2025, Vise-Prezidente Komisaun Ezekutiva (KE) Bee Timor-Leste Empreza Públika (BTL, E.P) ba Asuntu Korporativu, Sr. Manuel Tomás Amaral de Carvalho, akompaña hosi Diretór O&M, Jestór DAK, Ofisiál Legál BTL, E.P, Koordenadór BTL, E.P Liquiça ho ekipa realiza atividade sosializasaun kona-bá Dekretu Lei no Diploma Ministeriál, ba abitante sira iha suku Tibar, postu-administrativu Bazartete, munisípiu Liquiça.
Iha loron 24 fulan ne’e, Ekipa ne’ebé lidera hosi Vise-Prezidente KE BTL, E.P hamutuk ho reprezentante SEEAS hala’o mos diseminasaun Dekretu Lei no Diploma Ministeriál, ba populasaun sira iha suku Dato, postu-administrativu Liquiça Villa, munisípiu Liquiça.
Realizasaun atividade sosializasaun iha suku rua ne’e, ho objetivu hodi partilla informasaun sira liga ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”, atu abitante sira bele entende didi’ak, molok BTL, E.P halo melloramentu ba sistema bee nomos monta metru kontadór, iha suku Tibar no Dato, Liquiça.
Vise-Prezidente KE ba Asuntu Korporativu, Sr. Manuel Tomás Amaral de Carvalho, enkoraja kliente sira atu koopera hodi kumpri selu tarifa bee, tanba osan ne’ebé uza ba halo investimentu osan boot liu kompara ho reseitas ne’e iha, ho nune’e husu kolaborasaun kliente nian hodi kontribui reseita liuhosi selu tarifa bee nian.
Iha biban ne’e, parte PNTL Eskuadra Postu-Administrativu Bazartete informa, lei fó dalan ba PNTL atu asegura fasilidade públiku sira ne’ebé instala ona iha fatin públiku sira, wainhira kliente sira halo estraga mak PNTL sei foti medida rigorozu. No PNTL Eskuadra Postu-Administrativu Bazartete mos pronto atu asegura funsionáriu ou ajende administrasaun públika ne’ebé halo servisu Estadu nian iha terrenu, liu-liu iha munisípiu Liquiça.
Iha ámbitu sosializasaun ne’e, abitante sira husu ba BTL, E.P atu halo uluk melloramentu molok monta metru kontadór bee nian. Hatan ba kestaun ne’e, Diretór O&M hatete, ba kliente sira ne’ebé asesu ona bee ho di’ak sei monta metru kontadór, maibé ba konsumidór sira ne’ebé seidauk hetan bee moos mak BTL, E.P sei halo uluk melloramentu.
Partisipa iha atividade diseminasaun ne’e, PAM Liquiça, PNTL Eskuadra Postu-Administrativu Bazartete no Liquiça Villa, xefe aldeia, xefe suku Tibar no Dato, abitante hosi suku Tibar no Dato.
Hafoin remata Sosializasaun iha suku Tibar no Dato, ekipa BTL, E.P kontinua observa kondisaun bee matan iha ne'ebé lokaliza iha Tibar
Fahe ba Sosial Media:
