Díli, 09/04/2025, Vise-Prezidente Komisaun Ezekutiva (KE) Bee Timor-Leste Empreza Públika (BTL, E.P) ba Asuntu Tékniku, Sr. José Filipe Ximenes Smith, akompaña hosi Jestór Legál, Jestór O&M, Ofisiál DAK, Ofisiál Legál BTL, E.P, Jestór O&M ho ekipa hamutuk ho DNRAS, PN-BESI-TL inklui parseiru JICA, kontinua realiza atividade sosializasaun kona-bá Dekretu Lei no Diploma Ministeriál, ba abitante sira iha aldeia Wedalac, suku Bairo-Pité, postu-administrativu Dom Aleixo, munisípiu Díli.
Realizasaun atividade sosializasaun ne’e ho objetivu hodi partilla informasaun sira liga ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”, atu abitante sira bele entende didi’ak, molok BTL, E.P halo melloramentu ba sistema bee, iha aldeia Wedalac, suku Bairo-Pité.
Vise-Prezidente KE ba Asuntu Tékniku, Sr. José Filipe Ximenes Smith agradese ba autoridade lokál no komunidade ne’ebé bele partisipa iha sorumutu importante ida ne’e, atu rona informasaun sira hosi BTL, E.P liga ba ezisténsia no knaar empreza estatál ne’e nian.
Vise-Prezidente KE ba Asuntu Tékniku akresenta, hafoin sosializasaun ne’e, iha tempu badak, ekipa BTL, E.P sei halo levantamentu dadus tékniku, hodi indentifika problema sira iha aldeia Wedalac, molok halo melloramentu ba sistema bee, tanba ne’e husu autoridade lokál no abitante sira-nia apoiu tomak ba ekipa BTL, E.P hodi halo servisu iha terrenu.
Iha biban ne’e, parte PN-BESI-TL nudár organizasaun sosiedade sivil hanesan parseiru krítiku governu nian, ne’ebé durante ne’e servisu hamutuk ho entidade relevante sira iha setór bee no saneamentu hodi halo advokasia. Tanba ne’e, wainhira fornesimentu bee la adekuadu, hanesan organizasaun sosiedade sivil nafatin husu ba governu, hodi responde ba komunidade sira-nia preokupasaun sira.
Diretór PN-BESI-TL ne’e husu ba komunidade sira, wainhira fornesimentu bee to’o iha komunidade sira-nia fatin, tenke tau matan ba sistema sira, nune’e labele estraga. Tanba komunidade sira la kuida fasilidade mak ikus mai hetan estragu, populasaun sira sofre no labele asesu ba bee, liu-liu inan no alin feto sira mak sai vítima, tanba sira tenke buka bee ba nesesidade uma laran nian, ho nune’e, husu atu kontribui, nune’e bee labele falta.
Administradór postu-administradór Dom Aleixo, husu ba komunidade Surikmas, liu-liu aldeia Wedalac ne’ebé partisipa iha sosializasaun ne’e, hodi deskute hamutuk, fó ideia ba malu, nune’e bele hadi’a sistema bee iha aldeia refere, atu bele uza ba nesesidade loron-loron nian.
Autoridade postu ne’e solisita ba populasaun sira, liu-liu ba joven sira, atu apoiu ou fó kontribuisaun ba atividade BTL, E.P sira ne’ebé sei halo iha parte Surikmas, nune’e servisu hotu bele la’o ho di’ak, hodi responde ba abitante sira-nia preokupasaun durante tinan naruk la hetan bee moos.
Xefe aldeia Wedalac husu ba komunidade sira ne’ebé partisipa iha sosializasaun ne’e, atu rona informasaun sira ho didi’ak nomos hotu-hotu bele hato’o direta sira-nia preokupasaun no sujestaun sira ba nain ulun sira ne’ebé ohin to’o my ona iha fatin ne’e.
Iha ámbitu sosializasaun ne’e, abitante hosi aldeia Wedalac hato’o mos sira-nia preokupasaun no sira mos rekoñese katak, durante ne’e sira uza bomba elétrika/sanyo hodi dada bee, tanba presaun bee la to’o no abitante balun mos la selu tarifa bee, maibé ba oin sira sei koopera atu selu bee.
Abitante Wedalac husu ba BTL, E.P atu desliga tiha sanyo ne'ebé konsumidór balun uza hodi dada bee iha aldeia refere, atu nune'e populasaun seluk bele asesu mos bee ho di'ak.
Enkuantu abitante aldeia Wedalac ne’ebé selu ativu tarifa bee mak uma kain 33, maibé uma kain 1166 seluk la selu bee, maske durante ne’e sira asesu hela bee inklui uma kain balun uza sanyo liga direta ba sistema kanalizasaun públiku.
Partisipa iha atividade diseminasaun ne’e, Administradór PA Dom Aleixo, xefe aldeia Wedalac no abitante aldeia Wedalac.
Fahe ba Sosial Media:
