Díli, 08/07/2025, Diretór O&M, Bee Timor-Leste Empreza Públika (BTL, E.P), Aleixo dos Santos, akompaña hosi Jestór DAK ho ekipa BTL, E.P hamutuk ho PN-BESI-TL, realiza atividade sosializasaun kona-bá Dekretu Lei no Diploma Ministeriál, ba abitante sira iha aldeia Suhurama, suku Lahane Oriental, postu-administrativu Nain Feto, munisípiu Díli.
Iha atividade sosializasaun ne’e, BTL, E.P partilla informasaun ba abitante sira, liga ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”. Atu nune’e abitante sira bele entende didi’ak regras BTL, E.P nian, liu-liu kona-bá oinsá atu selu tarifa bee, proibisaun ba koneksaun ilegál, labele estraga fasilidade públika nomos oinsá atu halo ligasaun foun.
Realizasaun atividade sosializasaun ne’e, hodi esplika uluk regulamentu sira ba komunidade aldeia Suhurama, molok BTL, E.P halo melloramentu ba sistema kanalizasaun iha aldeia referida.
Iha biban ne’e, Diretór O&M husu ba abitante aldeia Suhurama, atu koopera ho BTL, E.P, nune’e hafoin sosializsaun ne’e, tékniku BTL, E.P nian sei tun ba terrenu, hodi halo servisu melloramentu ba sistema kanalizaun, nune’e hodi dada bee ba komsumidór ida-idak nia fatin.
Xefe aldeia Suhurama agradese ba BTL, E.P, tanba bele to’o iha sira-nia aldeia. Xefe aldeia ne’e hatete, ohin hanesan oportunidade dahuluk BTL, E.P mai fahe ona informasaun kona-bá regulamentu BTL, E.P nian ba abitante sira iha aldeia ne’e no husu ba partisipante sira atu kumpri regras sira ne’ebé mak ohin partilla hosi BTL, E.P.
Partisipa iha atividade diseminasaun ne’e, lideransa komunitária no abitante aldeia Suhurama, suku Lahane Oriental.
Fahe ba Sosial Media:
