Dili, 07/12/2023. Iha loron 5 fulan ne'e, Diretór O&M BTL, E.P Sr. Aleixo dos Santos ho Ofisiál O&M Abastesimentu Bee despede estajiáriu nain tolu hosi UNTL, Fakuldade Enjeñaria & Teknolojia, Departamentu Enjeñaria Mekánika ne'ebé mak remata ona sira nia estájiu iha DOM durante fulan rua. Seremónia despedida ne'e partisipa mos hosi Diretór Departamentu Enjeñaria Mekánika UNTL nian. No realiza iha salaun DOM BTL E.P, Caicoli.
Iha seremónia despedida ne'e, estajiáriu sira mos halo aprezentasaun kona-bá relatóriu estájiu nian. Nob liuhosi rezultadu aprezentasaun ne'e, hatudu estudante sira entende prosesu abastesimentu bee moos iha Díli, liu-liu zona hirak ne'ebé sira hala'o sira nia estájiu profisionál ba.
Durante estájiu, estajiáriu sira enfrenta dezafiu lubuk ida hamutuk ho tékniku operadór sira, iha terrenu, tamba sempre hasoru kliente ho tipu oi-oin. Maibé, sira sente kontente tamba bele hola parte ona iha ekipa tékniku BTL,E.P nian, hodi produz ona rangkaian metru kontadór ho totál 100-resin no halo mos instalasaun ou kanaliza bee moos ba komunidade sira.
Iha biban ne'e, Diretór DOM hato'o agradesimentu ba estajiáriu sira, tamba bele apoiu ona BTL,E.P liuhosi servisu O&M nian, iha terrenu hodi hasa'e reseitas iha tinan ida ne'e. No ohin entrega hikas ba Dosente UNTL, Departamentu Enjeñaria Mekánika.
Iha fatin hanesan, Diretór hosi Departamentu Enjeñaria & Mekánika, Profesór Mário Marques Cabral mos fó agradesimentu wa'in ba ekipa BTL,E.P hahú hosi Prezidente to'o ba tékniku sira ne'ebé mak akompaña ona estudante sira ne'e ho di'ak to'o programa estájiu profisionál ne'e remata.
Atu finaliza, BTL,E.P mos fahe sertifikadu apresiasaun ba estajiáriu sira, nudár símbolu ida ne'ebé apoiu ona BTL,E.P ho di'ak.
Fahe ba Sosial Media:
