Baucau, 10/10/2022, Tékniku Operadór (T.O) Bee Timor-Leste, Empreza Públika (BTL, E.P), munisípiu Baucau hamutuk ho traballadór Mão de Obra, kontinua halo servisu manutensaun ba kanu distribuisaun bee ne’ebé intupidu, iha aldeia Multi, suku Villa Nova, munisípiu Baucau, hahú hosi área rotunda Villa Nova to’o edifísiu BNCTL.
Atividade manutensaun ne’e, hetan apoiu hosi parte Bombeiros, hodi uza kareta tanke bee tiru kanu ne’ebé intupidu makaas. Kanu distribuisaun balun normaliza no bee la’o normál fila-fali maibé kanu balun manutensaun seidauk finaliza no ekipa sei kontinua hala’o servisu refere.
Alende servisu manutensaun, ekipa ne’e mos kontinua halo normalizasaun ba koneksaun ilegál ualu ne’ebé mak komunidade sira liga bee ho ilegalmente.
Tuir informasaun hosi Koordenadora BTL, E.P munisípiu Baucau katak, hafoin tékniku sira hakotu koneksaun bee ilegál ne’e, komunidade sira ne’ebé komete aktu ne’e direta ba edifísiu BTL, E.P Baucau hodi rejista no halo pagamentu, nune’e loron nee kedas tékniku sira kontinua halo ligasaun bee foun komunidade sira-nia hela fatin, tuir padraun BTL, E.P nian, maibé komunidade ida mak seidauk ba halo rejista no pagamentu.
Ekipa BTL, E.P sei kontinua halo manutensaun ba liña distribuisaun hirak ne’e nomos halo kontrolu ba koneksaun bee ilegál sira, nune’e komunidade sira bele liga tuir padraun BTL, E.P atu bee bele sufisiente ba ema hotu.
Fahe ba Sosial Media:
