Baucau, 21/11/2022, Tékniku Operadór (T.O), Bee Timor-Leste, Empreza Públika (BTL, E.P) munisípiu Baucau, hamutuk ho traballadór Mão de Obra MdO, hahú instala kanu distribuisaun bee ba armazén CLN munisípiu Baucau, ne’ebé lokaliza entre suku Buibau no Bahu, iha postu-administrativu Baucau Villa, munisípiu Baucau.
Ekipa sira instala kanu distribuisaun hirak ne’e, hodi kanaliza bee ba armazén CLN munisípiu Baucau nian, nune’e bele fasilita funsionáriu sira ne’ebé hala’o knaar, iha fatin ne’e.
Koordenadora BTL, E.P Baucau informa, antes ne’e, CLN ba rejista ona iha edifísiu BTL, E.P Baucau, hodi sai kliente, no ohin mak foin instala kanu no hahú dada bee ba iha fatin refere.
Tuir regras kliente sira ne’ebé atu hetan bee ne’ebé kanaliza hosi BTL, E.P tenke rejista uluk inklui informa mos lokalizasaun kliente nian, nune’e tékniku sira bele tun ba terrenu hodi halo levantamentu tékniku molok dada ou kanaliza bee ba kliente sira nia hela fatin.
Liuhosi biban ne’e, BTL, E.P nafatin informa ba públiku, atu bele hakat bá iha edifísiu BTL, E.P ne’ebé estabele ona iha munisípiu ida-idak no kapitál Díli, hodi hetan informasaun detalla kona-bá kritéria oinsá atu halo ligasaun bee ba komunidade sira nia hela fatin, tuir padraun ou regras ne’ebé iha ona.
Fahe ba Sosial Media:
