Baucau, 24/11/2022, Tékniku Operadór (T.O) Bee Timor-Leste, Empreza Públika (BTL, E.P) munisípiu Baucau, hamutuk ho traballadór Mão de Obra halo manutensaun ba kanu Sil ou kanu Rubber 8 polegada ne’ebé kotu, iha bomba SP CR-90 no 95-10 Uailia, munisípiu Baucau.
Tuir informasaun hosi BTL, E.P Baucau katak, ho kanu Sil ne’ebé estragus ne’e, afeta direta ba bomba Uailia, nune’e tékniku operadór sira labele opera bomba ne’e, hodi produz bee, tamba ne’e, ba dadaun ne’e komunidade sira labele asesu bee hanesan normál, maibé hafoin remata faze manutensaun no rezolvidu ona, mak foin bele distribui hikas bee ba konsumidór sira.
Hafoin identifikasaun estragus refere, tékniku sira mobiliza materiál no tun kedas ba terrenu, hodi halo intervensaun, nune’e bele garante bee ba abitante sira ne’e, ne’ebé durante ne’e asesu bee hosi bomba Uailia.
Daudaun ne’e, tékniku sira nafatin iha terrenu, hodi halo servisu, tamba ne’e, BTL, E.P nafatin husu komunidade sira, liu-liu konsumidór sira ne’ebé durante ne’e asesu bee hosi bomba Ualia, atu kolaborasaun no pasiénsia tomak hodi hein, prosesu manutensaun, hafoin normaliza ona, mak foin bele fornese fila-fali bee ba kliente sira.
Fahe ba Sosial Media:
