Baucau, 21/12/2022, Tékniku Operadór (T.O), Bee Timor-Leste, Empreza Públika (BTL, E.P) munisípiu Baucau, hamutuk ho traballadór Mão de Obra MdO, ohin finaliza kanalizasaun bee ba Torre Armazén CLN munisípiu Baucau, ne’ebé lokaliza entre suku Buibau no Bahu, iha postu-administrativu Baucau Villa, munisípiu Baucau.
Iha imajen ne’ebé hatudu, kanalizasaun bee ba Armazén CLN Baucau ne’e ho rezultadu di’ak, tanba bee sai ho presaun boot, nune’e hahú loron 21 fulan ne’e sira bele asesu ona bee moos.
Durante ne’e, tékniku operadór sira halo servisu melloramentu hanesan ke’e hodi hakoi kanu distribuisaun to’o iha armazén CLN Baucau ne’e, ho distánsia metru 1530 (1530 m), maibé ekipa téknika esforsu hodi finaliza iha tempu ne’ebé badak, nune’e hakarak atu kliente sira bele asesu lalais kanalizasaun bee hosi BTL, E.P.
Koordenadora BTL, E.P Baucau informa, antes ne’e, CLN ba rejista ona iha edifísiu BTL, E.P Baucau, hodi sai kliente, hafoin rejista hahú orienta kedas tékniku sira, hodi halo servisu melloramentu no horseik konsege finaliza servisu refere ho rezultadu ne’ebé di’ak.
Hafoin finaliza kanalizasaun bee ne’e, Xefe CLN munisípiu Baucau sente kontente no hato’o agradesimentu ba BTL, E.P tanba bele lori bee hakbesik ba sira nia fatin. No Xefe CLN Baucau mos relembra fali ba BTL, E.P atu halo pedidu pagamentu finál, nune’e parte CLN Baucau bele kompleta pagamentu liga ba kanalizasaun sistema bee ba sira nia Armazén.
Liuhosi biban ne’e, BTL, E.P nafatin informa ba públiku, atu bele hakat bá iha edifísiu BTL, E.P ne’ebé estabelese ona iha munisípiu ida-idak no kapitál Díli, hodi hetan informasaun detalla kona-bá kritéria oinsá atu halo ligasaun bee ba komunidade sira nia hela fatin, tuir padraun ou regras ne’ebé iha ona.
Fahe ba Sosial Media:
