Díli, 11/10/2023, Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo da Cruz, enkontru ho ekipa hosi parseiru Banku Mundiál, iha sala reuniaun Ezekutiva BTL, E.P, Caicoli.
Objetivu hosi enkontru ne’e, parseiru hosi Banku Mundiál hakarak hatene informasaun kona-bá reforma ne’ebé akontese iha setór ida ne’e (DGAS ba BTL, E.P no ANAS, I.P), maibé hafoin iha governasaun da-IX nian, muda fila-fali ANAS, I.P ba Dirasaun. Nomos oinsá haree ba progresu dezenvolvimentu iha setór bee no saneamentu iha institusionalmente no dezafiu sira iha futuru ligadu ho investimentu sira ne’ebé daudaun ne’e hahú ona. Alende ne’e, oinsá kooperasaun ho parseiru dezenvolvimentu sira nia servisu iha setór ida ne’e, atu nune’e, bele fó biban ba sira bele konsolida forsa, hodi apoia iha setór refere.
Vise-Prezidente KE BTL, E.P esplika mos dezenvolvimentu iha setór bee la’o di’ak no iha progresu, maske seidauk máximu no servisu balun daudaun ne’e hala’o hela, hein katak iha futuru mai, meta ne’ebé mak hakerek ona iha Planu Estratejia Dezenvolvimentu Nasionál (PEDN) bele atinji ona balun.
Iha biban ne’e, Vise-Prezidente KE BTL, E.P informa mos kona-bá rekursu bee iha Gleno-Railaco ne’ebé antes ne’e, iha DGAS nia tempu, inisia ona estudu viabilidade no daudaun ne’e, iha ona faze finál.
Durante iha reuniaun ne’e, parte Banku Mundiál agradese tebes tanba bele hetan informasaun sira ligadu ho dezenvolvimentu setór bee no saneamentu ne’e rasik. parseiru Banku Mundiál mos nafatin prontu no iha kompromisu hodi apoia Governu Timor-Leste, liu-liu iha setór bee no saneamentu nian.
Fahe ba Sosial Media:
