Díli, 02/12/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz, akompaña hosi Diretór DOM, Aleixo dos Santos no Diretór DAF, Sidónio Freitas, enkontru ho ekipa hosi parseiru Unicef, kona-bá implementasaun projetu instalasaun tanke rezervatóriu iha Munisípiu haat. Enkontru ne’e rasik, hala’o iha sala reuniaun Ezekutivu BTL, E.P, Caicoli.
Reuniaun ne’e, hodi atualiza relatóriu ba implementasaun projetu instalasaun tanke rezervatóriu iha Munisípiu, Baucau, Ainaro, Ermera no Díli, ne’ebé mak finaliza no fornese ona bee moos ba populasaun sira, iha bairo ou aldeia ne’ebé durante ne’e susar atu asesu ba bee moos.
Hafoin aprezentasaun relatóriu hosi BTL, E.P, parseiru Unicef apresia tebes ho progresu implementasaun projetu referidu, maske iha fatin balun atraza no fatin balun dook hosi sistema bee, maibé ekipa BTL, E.P nafatin esforsu hodi instala polypipe no kanaliza bee ba tanke hirak ne’e.
Instalasaun tanke profil hirak ne’e, permanente iha bairo no aldeia ne’ebé identifikadu laiha bee, nune’e bele fasilita komunidade sira, atu asesu ba bee moos, hodi hein sistema kanalizasaun bee hosi BTL, E.P to’o iha sira-nia bairo ou aldeia, molok retira tanke refere.
Projetu ne’e, apoia hosi Governu Xina liuhosi parseiru Unicef iha Timor-Leste, ho totál orsamentu rihun $35. Hosi montante ne’e, rihun $17,500 hodi sosa tanke profil unidade 25, enkuantu rihun $17,500 utiliza ba mobilizasaun tanke no materiál sira seluk, solda tanke nia fatin, servisu instalasaun polypipe hodi enxe bee direta ba tanke hirak ne’e.
Iha okaziaun ne’e, parte rua (BTL, E.P ho Unicef iha TL) deskute mos kona-bá planu traballu anuál ba tinan 2026 nian
Fahe ba Sosial Media:
