Díli, 08/03/2024. Prezidente Komisaun Ezekutiva Bee Timor-Leste Empreza Públika (BTL, E.P) Eng. Carlos Peloi dos Reis hamutuk ho Vise-Prezidente KE BTL, E.P ba Asuntu Sistema Bee, Saneamentu no Drenajen, Sr. Gustavo da Cruz no Vise-Prezidente KE BTL, E.P ba Asuntu Boa Governasaun no Fortalesimentu Institusionál, akompaña hosi ekipa BTL, E.P asina Memorandum of Understanding-MoU ho UN Women, iha salaun enkontru edifísiu sentrál BTL, E.P, Caicoli, Díli.
Prezidente Komisaun Ezekutiva Bee Timor-Leste Empreza Públika (BTL, E.P) Eng. Carlos Peloi dos Reis hatete, MoU ne’e, atu bele hametin liu tan kooperasaun servisu entre BTL, E.P ho UN Women, hodi halo promosaun kona-bá igualdade jéneru nomos hadook feto hosi violénsia oin-oin inklui hodi revé polítika ligadu ho igualdade jéneru.
“Ohin ita asina Memorandum of Understanding ho ita nia maluk sira hosi UN Women ho intensaun ne’e atu parte rua koopera em termu de halo promosaun ba igualdade jéneru (gender equality). Alende ida ne’e, servisu hamutuk para ita bele reforsa liu tan objetivu sira kona-bá oinsá ita hadook ita nia feton ou inan sira hosi kualker violénsia, hanesan violénsia fíziku ka harassment/asédiu sira ne’e. Saida mak ita sei halo ba oin, primeiru ita nia maluk sira hosi UN Women sei halo revizaun ba polítika sira ne’ebé eziste ona, para fó rekomendasaun, oinsá polítika sira ne’e refleta ba objetivu ida kona-bá igualdade jéneru ne’e nomos proibisaun violénsia ba ita nia inan feton sira, ida ne’e asaun dahuluk ne’ebé sira sei halo. No parte BTL, E.P nian mak sei prepara ou iha pontu vokál espesiál ida hosi BTL, E.P hanesan pontu kontaktu pesoál ho sira no ita sei fornese informasaun ne’ebé iha ba sira”. Esplika Ezekutivu BTL, E.P
Ezekutivu BTL, E.P akresenta asina MoU ohin ne’e, hodi formaliza kooperasaun servisu ne’ebé parte rua antes ne’e realiza ona, hanesan iha fulan kotuk UN Women apoia hodi fasilita ona semináriu ida kona-bá “prevene violénsia bazeia ba jéneru no asédiu sexual iha fatin servisu nian”
UN Women Head Office, Nistha konsidera provizaun servisu esensiál sira ne’e nudár rekezitu ida ne’ebé ho kualidade aas ba feto sira nia moris. Tanba feto sira fó sira nia tempu hodi kontribui halo servisu, ho nune’e liuhosi kooperasaun ne’e, hein katak BTL, E.P bele inkorpora perspetiva kona-bá provizaun servisu importante sira ne’ebé bele iha diferensa ba mane no feto. Nomos bele asegura katak fatin servisu ne'ebé seguru ba feto sira.
Fahe ba Sosial Media:
