Díli,30/01/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis asina kontratu ho kompañia rua hanesan CDFG Unipessoal Lda no Mamatelu Tuniva Unipessoal Lda kona-bá implementasaun projetu melloramentu sistema fornesimentu bee moos ba iha postu-administrativu Ossu, munisípiu Viqueque, projetu konstrusaun sistema bee moos ba postu-administrativu Zumalai, munisípiu Covalima. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Molok asina kontratu Prezidente K.E BTL, E.P agradese ba autoridade lokál sira nia apoiu tanba akompaña ona tékniku ou enjeñeiru BTL, E.P nian durante levantamentu dadus iha terrenu no finalmente bele to’o iha faze selebrasaun kontratu ne’e, hodi kanaliza bee ba abitante sira, iha postu-administrativu Ossu no Zumalai.
Prezidente BTL, E.P husu ba kompañia manan na’in sira, atu kumpri regras ne’ebé estabelese ona iha kontratu laran, katak implementasaun projetu fíziku tenke termina tuir tempu ne’ebé estabelese ona, maibé kompania mak la kumpri regras ne’ebé parte rua konkorda ona, BTL, E.P sei fó sansaun ba kompañia sira, liuhosi aplika multa ba kompañia implementadór sira, wainhira laiha justifikasaun ne’ebé klaru no razoavel. Tanba ne’e, solisita ba kompañia sira atu koopera, hodi ezekuta servisu ho lalais tuir tempu ne’ebé iha no tenke garante mos kualidade projetu ne’e rasik, nune’e projetu finaliza bele fornese ona bee ba komunidade sira iha fatin rua ne’e.
Alende ne’e, atu labele prejudika projetu fíziku iha terrenu, Ezekutivu BTL, E.P mos husu ba autoridade lokál sira atu koopera hodi apoia BTL, E.P no kompañia manan na’in, hodi rezolve problema sosiál ne’ebé mak mosu iha terrenu, nune’e bele finaliza tuir termu kontratu.
Iha fatin hanesan, Administradór postu-administrativu Ossu, Sebastião Ferreira Pires, sente kontente no agradese ba VIII Governu, liu-liu BTL, E.P tanba bele aprova ona proposta, atu kanaliza bee ba komunidade sira, liu-liu hodi rezolve problema bee moos iha Ossu.
Alende ne’e, kona-bá asuntu sosiál ou kestaun indemnizasaun, Administradór ne’e mos prontu atu koopera ho kompañia no BTL, E.P hodi rezolve, tanba ne’e nia husu ba kompañia implementadór, atu kontaktu ba Autoridade lokál sira, wainhira akontese problema ruma durante servisu konstrusaun la’o iha terrenu, Autoridade ne’e hato’o nia prontidaun, tanba hakarak dezenvolvimentu bele la’o ba oin.
Iha biban ne’e, Administradór postu-administrativu Zumalai, Rui dos Santos hatete presiza servisu hamutuk ou liña koordenasaun entre Autoridade Lokál, BTL, E.P no kompañia implementadór, hodi haree ou rezolve lakunas ne’ebé mak akontese iha terenu. Administradór ne’e mos husu ba kompãnia implementadór sira, atu ezekuta ou konstroi obra kona-bá sistema bee moos ne’e ho kualidade. Alende ne’e mos ba BTL, E.P atu kumpri regras hodi halo pagamentu ba kompañia implementadór sira, atu nune’e kompañia sira bele kontente no kaer obra ho di'ak.
Entretantu projetu melloramentu sistema Fornesimentu bee moos ne’e, sei implementa hosi kompañia CDFG Unipessoal Lda, iha postu-administrativu Ossu, munisípiu Viqueque, ne’ebé sei kobre iha postu-administrativu Ossu Villa. Sistema bee moos ne’e, sei benefisia ba populasaun 2.850 no sei fornese mos bee ba instituisaun 14, hanesan postu saúde, eskola, dormitóriu no igreja. Alende ne’e, sistema bee ne’e rasik, sei transforma ba sistema urbana, iha ne’ebé sei instala mos metru kontadór ba benefisiáriu uma kain 475.
Enkuantu projetu melloramentu sistema bee moos ba postu-administrativu Ossu nian, sei gasta orsamentu hamutuk $ 421,903.57 No fontes bee ne’ebé kanaliza ba postu refere mak bee matan Wai-Kirona ne’ebé lokaliza iha Monte Mundu Perdidu no Bee Matan Wai-Bua.
Alende ne’e, kompañia Mamatelu Tuniva Unipessoal Lda sei kaer obra kona-bá projetu konstrusaun sistema bee moos ne’ebé sei implementa iha postu-administrativu Zumalai, munisípiu Covalima, projetu ne’e sei gasta orsamentu $ 419,349.04 ho durasaun fulan neen no fontes bee matan Sumaloi (Gravitasaun). No sistema bee moos ne’e, sei monta mos metru kontadór unidade 630 ba uma kain sira no sei benefisia ba populasaun hamutuk 3.780, alende ne’e, sei fornee mos bee ba instituisaun 10, hanesan postu saúde, igreja no eskola.
Fahe ba Sosial Media:
