Díli, 08/05/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis akompña hosi Vise-Prezidente KE BTL, E.P ba Asuntu Boa Governasaun no Fortalesimentu Institusionál, Sra. Elizabeth Amaral, Diretór DOM, Diretór DEI, Jestór RP & GIS, Jestór Infraestrutura no Legál ho ekipa, asina kontratu ho kompañia MARLVI Unipessoal Lda, kona-bá implementasaun Projetu Melloramentu Sistema Fornesimentu Bee Moos ba iha postu-administrativu Letefoho, munisípiu Ermera 01. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Molok asina kontratu, Prezidente K.E BTL, E.P husu ba kompañia manan na’in ne’e, atu kumpri regras ne’ebé determina ona iha kontratu laran, nune’e bele aselera projetu kanalizasaun bee ba komunidade sira, iha postu-administrativu Letefoho.
Alende ne’e, iha entrevista Prezidente KE BTL, E.P hatete, BTL, E.P kontrata tan kompañia lokál ida, hodi implementa projetu melloramentu sistema bee moos, iha Letefoho, hein katak iha tempu badak kompañia implementadór bele mobiliza ona materiál sira, hodi hahú halo servisu iha terrenu.
“Ohin loron ita asina kontratu ho kompañia ou ita nia parseiru ida komesa halo servisu melloramentu sistema bee moos iha kapitál postu Letefoho nian, ne’ebé sei benefisia ba suku rua ou tolu, suku Dukurai, Katrai-Kraik no Haufu. Ne’ebé espera katak hafoin ohin ita asina kontratu ita nia parseiru, liu-liu kompañia manan na’in bele mobiliza ona sira nia ekipamentus tékniku sira atu bele halo servisu lalais iha terrenu,” hatete Ezekutivu BTL, E.P
Atu labele prejudika implementasaun projetu fíziku iha terrenu, Ezekutivu BTL, E.P husu ba Autoridade lokál sira, atu nafatin koopera ho BTL, E.P no kompañia implementadór, hodi asegura projetu refere, nune’e labele atraza kanaliza bee moos ba komunidade sira.
“Ha’u hakarak agradese ba nain hira nia apoiu, tanba durante bele apoia ona ami nia tékniku sira halo levantamentu dadus téknika iha terrenu no nafatin husu ba Administradór Postu no Xefe suku sira nia apoiu, hafoin asina kontratu ida ne’e, atu apoia kompañia MARLVI ho ekipa BTL, E.P ninian, hodi asegura implementasaun servisu iha terrenu. Liu-liu problema sira ne’ebé liga ba kestaun sosiál, ami husu atu na’in hira (Administradór Postu no Xefe suku sira) ajuda rezolve problema sosiál hirak ne’e. Karik kestaun sira ne’ebé liga ba tékniku nian, husik ita nia parseiru kompañia MARLVI no BTL, E.P mak sei haree. Tanba ita nia objetivu mak hodi mellora sistema, atu nune’e wainhira sistema remata ita nia komunidade sira iha suku rua, liu-liu iha suku Dukurai no Katrai-Kraik sira mos bele asesu ba bee ho regulár no kualidade,” dehan Prezidente K.E BTL, E.P.
Nune’e mos, atu garante kualidade projetu refere, BTL, E.P mos sei destaka tékniku ou enjeñeiru nain rua, nune’e hodi akompaña servisu fíziku iha terrenu to'o remata.
Iha fatin hanesan, Diretór Kompañia MARLVI Unipessoal Lda, Délio dos Santos Martins, agradese ba konfiansa tomak hosi BTL, E.P no sira promete sei kumpri akordu ne’ebé iha nomos sei garante kualidade projetu ne’e rasik.
“Kompañia agradese ba BTL, E.P ne’ebé fó fiar ba kompañia MARLVI no kompañia sei halo tuir buat ne’ebé mak tau ona iha kontratu laran fulan neen, hanesan ohin Prezidente BTL, E.P ko’alia katak kompañia sei hala’o servisu tuir tempu ne’ebé tau ona iha kontratu laran. Kompañia mos sei garante katak sei sosa materiál sira ne’e ho kualidade tuir espesifikasaun ne’ebé BTL, E.P fó. Kompañia mos fó garantia ba projetu ne’e durante tinan ida. No agora asina ona, aban ami hahú mobiliza tékniku sira hodi tun ba terrenu hodi haree fatin no hahú servisu ona,” hatete nia.
Iha biban ne’e, Xefe suku Dukurai, Rafael Soares Maia, agradese ba VIII Governu Konstitusionál, tanba liuhosi BTL, E.P bele aprova no kontrata ona kompañia, hodi dada bee ba sira nia suku.
“Primeiru hakarak agradese ba Prezidente BTL, E.P nomos BTL, E.P munisípiu Ermera tanba bele aprova ona proposta bee mos ne’ebé ho distánsia dook, tanba bee matan iha Katrai-Kraik depois bee ne’e nia kanalizasaun liuhosi suku Dukurai mai to’o suku Haufu, iha postu Letefoho. Ami nia suku (ha’u ho kolega xefe suku nain rua seluk) bele orienta no prepara saida de’it mak ohin kompañia manan nain kompromete ona katak aban ou bainrua sei hahú, tanba ne’e ha’u hein iha fatin no koopera ho komunidade hodi hein kompañia ne’ebé sei ezekuta servisu bee moos iha ami nia suku rasik,” dehan Xefe Suku Dukurai.
Projetu Melloramentu Sistema Fornesimentu Bee Moos iha P.A Letefoho, munisípiu Ermera 01 ne’e, sei implementa hosi kompañia MARLVI Unipessoal Lda ho durasaun tempu fulan neen no orsamentu ne’ebé prevé ba projetu refere ho montante $ 835.054,69.
Projetu bee moos ne’e ho sistema gravitasaun iha ne’ebé sei kanaliza bee hosi bee matan Erasali ho débitu 4 Lps, Eratoi 9 Lps no bee matan Erapu 2 Lps, No projetu bee moos ne’e, sei transforma ba sistema urbana, iha ne’ebé sei instala mos metru kontadór ba benefisiáriu sira. Alende ne’e, sei mellora mos intake Erasali no Eratoi nomos sei intalla kanu tranzmisaun ho distánsia metru 17572, tanke BPT unidade neen ho metru kúbiku 6 (6m3) no tanke distribuisaun unidade 11 ho metru kúbiku 20 (20m3).
Enkuantu projetu Melloramentu Sistema Fornesimentu Bee Moos ne’e, sei kobre iha postu-administrativu Letefoho, liu-liu suku Katrai-Kraik, Dukurai no Haufu, ho uma kain 880 no totál populasaun 5.280, inklui sei fornese mos bee ba fasilidade públika hanesan, postu saúde, eskola no igreja.
Fahe ba Sosial Media:
