Díli, 14/10/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) selebra kontratu ho kompañia nasionál tolu hodi implementa projetu kona-bá Melloramentu Sistema Bee Moos ba postu-administrativu Vemasse munisípiu Baucau no postu-administrativu Cribas, munisípiu Manatuto nomos projetu Fornesimentu Instalasaun Liner Tank ba suku Mehara, Luro, Quelicai no Metinaro. Atividade asina kontratu ne’e rasik, realiza iha salaun enkontru, edifísiu sentrál BTL, E.P, Caicoli.
Iha abertura Prezidente K.E BTL, E.P sita kestaun balun, atu kompañia no autoridade lokál sira presiza tau iha konsiderasaun, katak wainhira mosu faillansu iha parte tékniku, BTL, E.P no kompañia mak sei responsabiliza maibé kona-bá kestaun sosiál parte autoridade lokál sira mak rezolve, nune’e parte hotu ida-idak iha nia responsabilidade, nune’e labele iha impedementu ba projetu fíziku iha terrenu.
Ezekutivu ne’e mos husu ba kompañia sira, wainhira kaer obra ne’e tenke ho responsabilidade signifika katak, tenke garante kualidade projetu no tuir tempu ne’ebé estabelese iha kontratu refere, maibé karik kompañia la kumpri regras hirak ne’e, mak BTL, E.P sei aplika multa ba kompania sira, wainhira sira la aprezenta razaun ne’ebé klaru ba BTL, E.P.
Iha fatin hanesan Administradora postu-administrativu Manatuto Villa, Clara de Carvalho Ximenes agradese tebes tamba ida ne’e parte importante tebes relasiona ho dezenvolvimentu sistema bee moos, iha área rural no área urbana maibé presiza iha liña koordenasaun ne’ebé di’ak entre kompañia no autoridade lokál, atu nune’e bele solusiona problema ruma, iha terrenu.
Nune’e mos Lideransa Komunitária Vemasse no Cribas agradese ba BTL, E.P tamba bele simu no konsidera sira-nia preokupasaun, hodi responde ona ba sira-nia preokupasaun hirak ne’e liu-liu kona-bá bee moos, tamba ne’e sira prontu koopera hodi asegura implementa projetu refere, iha sira-nia suku, maibé importante liu mak meius komunikasaun di’ak entre parte kompañia no autoridade lokál sira.
Kontratu entre BTL, E.P ho kompañia tolu hanesan, kompañia Karisma Unipessoal Lda, sei kaer obra kona-bá projetu Melloramentu Sistema Bee Moos ba iha postu-administrativu Vemasse, munisípiu Baucau ho orsamentu ne’ebé sei finansia ba projetu ne’e, hamutuk Dollar Americano rihun atus tolu tolu-nulu resin-tolu atus-ualu-lima ho sentavos ualu-nulu-resin-ida ($ 337,805.81).
Enkuantu kompañia Mercy Unipessoal Lda sei kaer obra Melloramentu Sistema Bee Moos, ba iha postu-administrativu Cribas, munisípiu Manatuto ho totál orsamentu Dollar Americano rihun atus-rua lima-nulu resin-lima atus-lima ualu-nulu resin-lima ho sentavos sia-nulu resin-lima ($ 255,585.95).
Entretantu kompañia Ukad Mape Goll Unipessoal Lda, sei responsabiliza ba projetu kona-bá Fornesimentu Instalasaun Liner Tank ba suku Mehara, postu-administrativu Tutuala, munisípiu Lautém, Luro, postu-administrativu Luro, munisípiu Lautém, Quelicai, postu-administrativu Quelicai, munisípiu Baucau no postu-administrativu Metinaro, munisípiu Díli, ho fundus ba projetu ne’e hamutuk Dollar Americano rihun atus-tolu tolu-nulu resin-sia atus-ualu ualu-nulu resin-sia ho sentavos tolu-nulu resin-hitu ($ 339,889.37).
Alende ne’e, projetu fíziku kona-bá Melloramentu Sistema Bee Moos no projetu Fornesimentu Instalasaun Liner Tank ne’e, ho durasaun fulan neen.
Fahe ba Sosial Media:
