Díli, 11/11/2025, Prezidente Komisaun Ezekutiva, Bee Timor-Leste, Empreza Públika (BTL, E.P), Gustavo da Cruz, Vise-Prezidente KE BTL, E.P ba Asuntu Tékniku, José Filipe Ximenes Smith, Vise-Prezidente KE BTL, E.P, ba Asuntu Korporativu, Manuel Tomás Amaral de Carvalho, akompaña hosi Diretór DAF, O&M, Jestór Infraestrutura ho ekipa hamutuk ho PMU WatSan akompaña S.E Ministru Obras Públikas (MOP), Samuel Marçal selebra kontratu ho kompañia Internasional China Nuclear Industry 22nd Construction, Lda (China), ba implementasaun projetu Melloramentu Sistema Fornesimentu Bee Moos, iha kapitál Munisípiu Manufahi.
Projetu Melloramentu Sistema Fornesimentu Bee Moos ba Munisípiu Manufahi ne'e, finansia hosi fundu empréstimu hosi Banku Dezenvolvimentu Aziátiku (ADB, sigla inglés) ho montante millaun $ 15.6.
Rekursu bee ne’ebé sei utiliza ba kanalizasaun mak sistema gravitasaun Merbuti, Erluli no Darelau nomos sistema bomba ou perfurasaun. Inklui sei instala kanu transmisaun ho distánsia kilómetru 19,42 no kanu distribuisaun kilómetru 75,04 inklui konstrusaun tanke rezervatóriu hamutuk hitu.
Futuru invetimentu ba sistema fornesimentu bee moos ne’e, sei benefisia ba komunidade uma kain 3,027 ho totál populasaun 30,060.
Alen de ne'e ohin, S.E MOP selebra mos kontratu ho kompañia internasionál PT Nusa Konstruksi Enjiniring TBK. Indonesia, hodi implementa projetu konstrusaun edifísiu foun Ministériu Obras Públikas nian.
Partisipa iha serimónia ne’e, Vise-ministru Infraestrutura, SEEAS, Prezidente Instituisaun Autónomas, Diretór no Diretora sira inklui kompañia.
Fahe ba Sosial Media:
