𝐃𝐢́𝐥𝐢, 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚 𝟏𝟒 𝐒𝐞𝐭𝐞𝐦𝐛𝐫𝐮 𝟐𝟎𝟐𝟔
Vise-Prezidente Komisaun Ezekutiva (KE) BTL, E.P ba Asuntu Tékniku, José Filipe Ximenes Smith hamutuk ho Diretór DOM, Aleixo dos Santos, Jestór Distribuisaun, Koordenadór Armazérn BTL, E.P ho ekipa akompaña aprezentasaun relatóriu finál estájiu nian, hosi estajiáriu Kanalizasaun no Soldadura, hafoin finaliza sira-nia estájiu profisionál iha BTL, E.P. Aprezentasaun ne’e, realiza iha sala reuniaun DOM, Caicoli.
Iha intervensaun, Vise-Prezidente KE BTL, E.P ba Asuntu Tékniku, José Filipe Ximenes Smith apresia ho estajiáriu sira-nia responsabilidade no seriedade hodi hala’o estájiu profisionál, tanba hafoin finaliza estájiu, sira bele aprezenta relatóriu finál estájiu nian. Ida ne’e, hatudu katak sira iha ona sentidu responsabilidade no bele aplika iha futuru, wainhira sira hala’o knaar ruma, iha nasaun ida ne’e.
Ezekutivu BTL, E.P hatete, matenek no esperiénsia sei la naton, nune'e presiza mos iha integridade pesoál, komportamentu umana, prontidaun no lealdade nomos labele egoísta, hahalok hirak ne’e, hodi kompleta sai profisionál liu tan. Tanba formandu sira ne’ebé hetan ona formasaun profisionál ou kualifikadu sei kompete iha merkadu traballu, nune’e presiza ema ne’ebé iha sentidu responsabilidade no disiplina.
Alen de ne’e, obstákulu ne’ebé estajiáriu sira enfrenta iha terrenu, Vise-Prezidente KE BTL, E.P ba Asuntu Tékniku konsidera, ida ne’e la’ós dezafiu, maibé nudár oportunidade hodi buka hatene no apreende, nune’e bele aumenta koñesimentu durante hala’o prátika ou estájiu iha terrenu, tanba prátika mak kritéria ne’ebé loloos, nune’e labele baruk atu apreende no nafatin prátika no kontinua kuda hahalok ne’ebé di’ak, nune’e bele fó benefísiu no susesu ba idak-idak nia moris.
Iha oportunidade ne'e, Diretór DOM hatete maske ho tempu estájiu nian ne’ebé limitadu tebes, maibé BTL, E.P jere oinsá bele koloka estajiáriu sira iha Departamentu idak-idak ne’ebé eziste iha BTL, E.P, hodi hala'o prátika no hetan esperiénsia, durante fulan ida iha terrenu. BTL, E.P mos nafatin nakloke no servisu hamutuk ho Sentru Formasaun sira hotu, atu bele simu estajiáriu sira, hodi hala’o sira-nia estájiu profisionál.
Reprezentante Diretór DAF no atuál Koordenadór Armazén, Florindo de Jesus, agradese tebes ba servsiu hamutuk durante fulan ida iha BTL, E.P, liu-liu apoia halo servisu fíziku iha armazén BTL, E.P nian.
Diretora Ezekutiva CNFP Becora, Bernardete Pinto Miranda Gomes, agradese ba BTL, E.P tanba bele fó espasu ba formandu sira hodi hala’o sira-nia estájiu profisionál, apresia no agredese ba Diretór, Jestór no ekipa BTL, E.P nian, ne’ebé orienta no akompaña ona estajiáriu sira iha terrenu hosi inisiu to’o remata, ho kondisaun no rezultadu ne'ebé di'ak, liuhosi sira-nia aprezentasaun relatóriu finál ohin nian. Maske ho limitasaun tempu, maibé sira apreende no hala’o duni sira-nia prátika iha terenu, hodi reforsa sira-nia 𝑠𝑘𝑖𝑙𝑙 ne’ebé sira hetan durante tuir formasaun iha CNFP Becora.
Estajiáriu CNFP Becora ne’ebé estajia iha BTL, E.P, hamutuk nain 14 no hala’o estájiu profisionál iha Departamentu Produsaun, Distribuisaun no Armazén BTL, E.P nian, durante fulan ida.
Fahe ba Sosial Media:
