Aileu, 25/11/2022, Tékniku Operadór (T.O) Bee Timor-Leste, Empreza Públika (BTL, E.P munisípiu Aileu, fahe ba ekipa rua, ekipa ida hodi hamoos intake iha Seloi-Kraik no normaliza kaptasaun, no ekipa seluk hadi’a liña transmisaun bee ne’ebé kotu, iha postu-administrativu Aileu Villa, munisípiu Aileu.
Bazeia ba informasaun hosi terrenu katak, udan boot ne’ebé akontese lor-loron, nune’e provoka rai henek taka metin tanke kaptasaun, hodi difikulta bee la tama ba iha rezervatóriu Malere A.
Ho intupidu ne’e, tékniku sira tun kedas ba terrenu hodi hamoos, nune’e sirkulasaun bee ba rezervatóriu bele normál fila-fali, hodi garante fornesimentu bee ba komsumidór sira, ne’ebé durante ne’e asesu bee hosi rezervatóriu Malere A.
Alende ne’e, servisu ida ne’e hanesan atividade regulár, hodi garante intake nafatin moos, no bee labele iha kontaminasaun ho sedimentasaun ou foer ruma, nune’e mos tanke kaptasaun labele akontese tan intupidu.
Tékniku Operadór BTL, E.P sempre halo kontrolu no hamoos intake inklui tanke rezervatóriu sira, nomos halo tratamentu ba bee, molok distribui ba konsumidór sira, nune’e hodi garante katak bee ne’ebé to’o iha komunidade sira nia fatin, moos ou ijiéne.
Enkuantu ekipa seluk akompaña traballadór Mão de Obra (MdO) hadi’a kanu transmisaun bee ne’ebé kotu, kauza hosi udan boot kada loron, nune’e provoka rai halai, hodi afeta direta ba kanu transmisaun, nune’e prejudika bee la tama ba tanke rezervatóriu.
Koordenadór BTL, E.P Aileu informa, ho estragus ne’e, tékniku sira tun kedas ba terrenu hodi normaliza imediata liña transmisaun refere, maibé ho kondisaun estragus grave nune’e tékniku sira tenke hala’o servisu refere durante loron rua, maske tékniku ho traballadór sira halo servisu ne’e ho kondisaun udan, maibé konsege rezolve estragus refere no daudaun ne’e bele distribui hikas bee ba rezervatóriu.
Fahe ba Sosial Media:
