Aileu, 23/11/2022, Tékniku Bee Timor-Leste, Empreza Públika (BTL, E.P) munisípiu Aileu, halo levantamentu dadus tékniku, iha suku Lahae, postu-administrativu Aileu Villa, munisípiu Aileu.
Atividade levantamentu ne’e realiza, hafoin hetan pedidu hosi Xefe suku Lahae, tamba tuir informasaun hosi komunidade sira iha suku ne’e katak, presaun bee kiik, nune’e iha pedidu ne’e, Xefe suku husu atu BTL, E.P bele halo intervensaun ruma, hodi bele rezolve kestaun ne’e. No tuir pedidu ne’e husu atu hadi’a rezervatóriu iha suku Lahae.
Ho pedidu hosi suku ne’e, tékniku BTL, E.P Aileu tun kedas ba terrenu, hodi observa no foti dadus tékniku, hodi hatene kauza hosi presaun bee kiik ne’e.
Tuir informasaun hosi terrenu katak, hafoin levantamentu dadus tékniku, rezultadu hatudu katak, intake mak la funsiona la’ós rezervatóriu. Ho intake ne’ebé la funsiona prejudika sirkulasaun bee ba rezervatóriu menus, nune’e bee ba komunidade sira kiik.
Hafoin levantamentu tékniku, BTL, E.P Aileu planea ona, atu halo reabilitasaun ba intake refere, hodi garante bee ba komunidade sira iha munisípiu Aileu, liu-liu suku Lahae.
Fahe ba Sosial Media:
