Díli, 10/01/2023, I Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Sr. Gustavo da Cruz, enkontru ho ekipa Unicef Timor-Leste, iha edifísiu sentrál BTL, E.P, Caicoli.
Enkontru ne’e, Unicef mai atualiza apoia ne’ebé fó ona mai BTL, E.P no koordena servisu ne’ebé parte rua (BTL, E.P & Unicef) sei halo iha tempu badak, liu-liu kona-bá preparasaun planu atu reativa Grupu Maneja Fasilidade (GMF), iha Ermera no Ainaro nomos futuru kooperasaun servisu kona-bá implementasaun sistema bee moos, iha munisípiu Ainaro no Viqueque.
Planu atu reativa no fó treinamentu ba GMF iha Ermera no Ainaro ne’e, tanba hodi bele tau matan no jere sistema instalasaun bee ne’ebé eziste ona iha sira nia suku rasik. Nune’e mos projetu foun seluk kona-bá sistema bee ne’ebé tuir planu sei implementa iha área rurál sira, liu-liu, iha munisípiu Ainaro no Viqueque nian, maibé molok atu implementa BTL, E.P sei identifika uluk fatin ne’ebé atu bele implementa projetu refere, tanba ne’e, BTL, E.P ho Unicef nafatin halo koordenasaun, hodi aselera prosesu hirak ne’e, molok hakat ba nia implementasaun.
Alende ko’alia kona-bá asuntu rua ne’ebé mensiona iha leten ne’e, Unicef mos relata kona-bá ofisiál handover ba fasilidade hanesan tanke ne’ebé instala iha kapitál Díli, hafoin akontese kalamidade iha loron 4 fulan abril tinan 2021, maibé situasaun normál ona, nune’e Unicef rekolla ekipamentu hirak ne’e, hodi entrega ba BTL, E.P, atu asegura didi’ak, atu nune'e bele utiliza fila-fali, wainhira akontese situasaun ne’ebé hanesan iha futuru. No asuntu ikus parte rua ko’alia mos kona-bá seremónia handover ba programa fase liman nian.
Fahe ba Sosial Media:
