Díli, 02/09/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz akompaña hosi Jestór hosi Departamentu Kontrolu Kualidade no Ambiente (DCQA, sigla portugés) ho Téknika DCQA hala’o reuniaun ho ekipa hosi UNIDO, iha salaun enkontru, edifísiu BTL, E.P sentrál, Caicoli.
Objetivu hosi sorumutu ne’e, hodi partilla informasaun no koordena ho Ezekutivu BTL, E.P nian, kona-bá atividade avaliasaun ba laboratóriu BTL, E.P nian, atu hetan akreditasaun iha futuru.
Iha reuniaun ne’e, Vise-Prezidente KE BTL, E.P ba Asuntu Sistema Bee, Saneamentu no Drenajen, apresia no hato’o agradese wa’in ba UNIDO nia prezensa no apoia tomak mai BTL, E.P, liu-liu kona-bá oinsá prosesu tomak atu laboratóriu BTL, E.P nian, bele hetan akreditasaun.
Entretantu atividade avaliasaun hahú ohin to’o loron 4 fulan ne’e. Maibé ohin hahú halo avaliasaun ho ekipa DCQA parte UNIDO observa uluk ekipamentu sira iha laboratóriu BTL, E.P nian, iha ETA Central, Bairo-Pité, hodi haree besik liu tan kondisaun fatin no ekipamentu sira nomos dadalia ho ekipa DCQA kona-bá utilizasaun ekipamentu sira no oinsá prosesu halo tratamentu ba bee, tantu teste fíziku, kímiku no baktéria nian, molok halo distribuisaun bee moos ba konsumidór.
Fahe ba Sosial Media:
