Díli, 07/02/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis, enkontru ho ekipa Konsultór hosi Ministériu Turizmu Komérsiu no Indústria (MTCI) kona-bá “Polítika Governu atu Implementa Ekoturizmu iha munisípiu Ataúro”, enkontru ne’e rasik, realiza iha Prezidente nia knaar fatin, edifísiu sentrál BTL, E.P, Caicoli, Díli.
Objetivu hosi enkontru ne’e, hodi halo konsultasaun kona-bá papel BTL, E.P nian ba Dezenvolvimentu Ekoturizmu iha munisípiu Ataúro. Katak Konsultór hosi MTCI mai halo konsultasaun ho Prezidente KE BTL, E.P, atu husu Ezekutivu nia perspetiva ou hanoin pozitiva balun kona-bá BTL, E.P nia pozisaun atu kontribui ba prosesu dezenvolvimentu Ekoturizmu iha Munisípiu Ataúro. Nune’e ho konsultasaun ne’e rasik, bele tulun ou fasilita Ministériu hodi kompleta elaborasaun matadalan kona-bá “Matadalan ba Dezenvolvimentu Ekoturizmu Munisípiu Ataúro”.
Entretantu munisípiu Ataúro sai hanesan fatin destinasaun ba Ekoturizmu iha futuru, ho nune’e, wainhira ho implementasaun Ekoturizmu iha Ataúro, númeru vizitante ou turista sei aumenta no klaru katak nesesidade ba uzu bee mos aumenta, tanba ne’e iha konsultasaun ne’e, atu BTL, E.P tau iha konsiderasaun katak, iha futuru bele halo melloramentu ou kanaliza sistema bee moos ne’ebé di’ak liu tan iha Ataúro, atu bele kontribui ba atividade turíztiku iha futuru.
Durante iha reuniaun ne’e, Ezekutivu BTL, E.P apresia tebes no fó resposta ne’ebé pozitiva katak, BTL, E.P rasik sei kolabora ho MTCI hodi haree kona-bá kestaun bee moos iha Ataúro, nune’e bele fasilita atividade turíztiku ne’ebé iha futuru sei implementa iha Munisípiu Ataúro.
Fahe ba Sosial Media:
