Díli, 30/06/2023. Bee Timor-Leste, Empreza Públika (BTL, E.P) ne’ebé reprezenta hosi Diretór DEI hamutuk ho Diretór-Jerál Terras no Propriedades (DJTP), Ministériu Justisa (MJ), Diretora Nasionál Servisu Kadastrais-Ministériu Justisa (DNSC-MJ) & Diretór Servisu Kadrastrais Terra no Propriedades Munisípiu Díli (DSCTP-MD, sigla portugés) nomos reprezentante Komandante PNTL Eskuadra Vera Cruz, hala’o sorumutu ho komunidade afetada, iha salaun enkontru BTL, E.P, Ciacoli, Díli.
Sorumutu ne’e, organiza hosi Project Management Unit-PMU BTL, E.P ho objetivu atu parte Diresaun Jerál Terras no Propriedades, bele fó esplikasaun ne'ebé detalla kona-bá prosedimentu libertasaun rai afetadu sira no esplika kona-bá estatutu rai ligadu ho reklamasaun hosi komunidade afetada sira, liu-liu liga ba komunidade sira nia parsela rai ne’ebé afeta direta hosi projetu Abastesimentu Sistema Bee iha Área Urbanu Díli.
Iha biban ne’e, parte Diresaun Jerál Terras no Propriedades halo mos aprezentasaun hodi esklarese kona-bá prosesu sira nomos fó tempu ba reklamante sira bele hato'o sira nia preokupasaun no sujestaun, nune'e bele tetu no akumula hamutuk ideia balun hosi komunidade sira, hodi elabora relatóriu no hakat ba prosesu tuir mai, molok ba faze atribuisaun rai hosi Ministériu Justisa ba BTL, E.P ne’ebé nudár na’in ba projetu refere, atu bele hahú halo investimentu ou implementasaun projetu fíziku.
Enkuantu komunidade sira ne'ebé afeta direta ba projetu refere mak parte Mascarenhas, Maloa, Ainitas-Hun, postu-administrativu Vera Cruz no Nahaek postu-administrativu Nain Feto.
Fahe ba Sosial Media:
