Díli, 13/04/2023, Vise-Prezidente Komisaun Ezekutiva ba Asuntu Bee, Saneamentu no Drenajen, Bee Timor-Leste, Empreza Públika (BTL, E.P), Sr. Gustavo da Cruz, enkontru ho ekipa hosi empreza Bolloré, iha Vise-Prezidente nia knaar fatin, edifísiu BTL, E.P sentrál, Caicoli.
Objetivu hosi enkontru ne’e, ekipa Bolloré mai introduz ou fahe informasaun kona-bá sira nia papél, shipping, fasilidade, ajénsia no mekanizmu hirak ne’ebé mak iha, oinsá hodi supply/hatama materiál ho lalais, atu nune’e BTL, E.P bele iha koñesimentu. Tanba sira hatene katak BTL hanesan empreza públika, nune’e iha investimentu boot lubuk ida ne’ebé sei implementa iha futuru, tanba ne’e, sei presiza materiál hosi estranjeiru.
Durante iha enkontru ne’e, BTL, E.P apresia tebes ba informasaun ne’ebé sira partilla, karik iha futuru BTL, E.P bele kompra/sosa direta materiá no ida ne’e, oportunidade di’ak ida uza shipping hosi Bolloré, hodi fasilita tranportasaun materiál sira ho rápida hosi rai liur, maibé daudaun ne’e, BTL,E.P sei utiliza supplier/fornesedór ou kompañia sira mak hatama ou fornese Materiál ou ekipamentu mai BTL, E.P.
Parte BTL, E.P mos konsidera informasaun ida ne’e di’ak, atu nune’e BTL, E.P bele introduz fila-fali ba kompañia sira ne’ebé implementa hela BTL, E.P nia projetu nomos projetu sira seluk ne’ebé sei implementa iha futuru, wainhira sira iha problema ruma kona-bá transportasaun materiál hosi estranjeiru mai iha Timor-Leste. Tanba, iha projetu balun ne’ebé mak iha, kompañia implementadór sira husu atu halo estensaun ba tempu kontratu, ho razaun katak materiál ne’ebé haruka hosi rai liur mak tarde nune’e labele finaliza obra ho lalais. Maibé ho informasaun ne’ebé mak ohin Bolloré hato’o ne’e, BTL, E.P bele hatene klaru prosesu tomak kona-bá supply materiál hosi estranjeiru mai rai laran ho tempu ne’ebé lalais. Nune’e iha futuru bele guia supplier/kompañia sira, hodi bele hetan konektividade. Tanba Bolloré mos iha rute durante loron 14 nian, loron 30, loron 28 to’o loron 90 nian, signifika sira nia tempu ba supply materiál ne’e di’ak no lalais.
Alende ne’e mos, liuhosi informasaun ne’e rasik, atu kompañia/supplier sira ne’ebé implementa hela projetu BTL, E.P nian, labele halo manobra oin-oin ho razaun materiál seidauk to’o no presiza tempu naruk hodi to’o iha Timor-Leste, nune’e kompañia implementadór sira atraza obra fíziku no kontinua husu estensaun kontratu, maibé ho esplikasaun kona-bá prosesu shipping hosi ekipa Bolloré ne’e, BTL, E.P bele apar didi’ak prosesu tomak, atu nune’e kompañia implementadór sira labele manobra hodi atraza projetu fíziku iha terrenu, tanba BTL, E.P hakarak kompañia implementadór sira tenke aselera servsiu fíziku, atu nune’e bele kanaliza lalais bee ba komunidade sira.
Fahe ba Sosial Media:
