Díli, 20/06/2025. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz hamutuk ho Koordenadór PMU/MOP Bee no Saneamentu ho ekipa enkontru ho Diretór Comissão Justiça e Paz Arquidiocese de Díli, Pe. Demétrio da Conceição Xavier ho ekipa, iha Lecidere.
Reuniaun ne'e, hodi ko'alia kona-bá mudansa terrenu ba rai misaun nian ne'ebé lokaliza iha Same, munisípiu Manufahi, ne'ebé afeta direta ba projetu investimentu sistema bee, liu-liu instalasaun tanke rezervatóriu nian. Nune’e ohin, BTL, E.P ho PMU/MOP Bee no Saneamentu atualiza fila-fali mapa anteriór no foun nian ba parte Dioseze.
Alen ne’e, Diretór Comissão Justiça e Paz Arquidiocese de Díli nian, Pe. Demétrio da Conceição Xavier, informa mos katak, Arsebispu Arkedioseze Metropolitana Díli, Dom Virgílio Kardeál do Carmo da Silva, SDB aseita ona hodi atribui fatin ne’e ba konstrusaun tanke rezervatóriu, maibé laiha kompras no venda ba rai refere, katak BTL, E.P utiliza de’it rai ne’e hodi instala tanke rezervatóriu, maibé rai refere nafatin sai proprietáriu Dioseze ou nafatin rai misaun nian.
Diretór Comissão Justiça e Paz Arquidiocese de Díli akresenta, wainhira instalasaun sistema bee ne’e finaliza, husu atu kanaliza mos bee ba igreja, kartóriu, rezidénsia no eskola.
Hafoin rona tiha informaasaun hosi parte Dioseze nian, Ezekutivu BTL, E.P hatete, BTL, E.P asesita no tau konsiderasaun ba pontu hirak ne’ebé parte Dioseze hato’o, nune’e iha tempu besik ekipa konjunta hosi BTL, E.P, PMU/MOP Bee no Saneamentu, Dioseze nomos DJTP sei tun hikas ba terrenu, hodi halo mapeamentu foun ba mudansa ne’ebé akontese, nune’e hodi hakat ba faze tuir mai.
Tuir planu, projetu melloramentu sistema kanalizasaun bee ne'e, sei implementa iha tinan ida ne'e, iha Same, munisípiu Manufahi.
Fahe ba Sosial Media:
