Ermera, 13/02/2025, Vise-Prezidente Komisaun Ezekutiva Bee Timor-Leste, Empreza Públika, ba Asuntu Tékniku, Sr. José Filipe Ximenes Smith, Vise-Prezidente Komisaun Ezekutiva Bee Timor-Leste, Empreza Públika, ba Asuntu Korporativu, Sr. Manuel Tomás Amaral de Carvalho, akompaña Diretór Diresaun Engiñaria no Investimentu, Jestór Infraestrutura, Engiñeiru, Kordenadór Munisípiu Ermera ho ekipa, hala’o sosilizasaun informasaun ba autoridade lokál no komunidade sira, iha Postu Administrativu Hatolia B.
Iha intervensaun, Reprezentante Administradór hatete, durante ne’e populasaun iha postu administrativu hatolia halerik ba bee moos, maibé governu liu hosi Bee Timor-Leste, Empreza Públika, bele lori ona projetu melloramentu sistema bee moos ida ne’e, atu implementa iha postu ne’e rasik.
Iha fatin hanesan, Adjuntu Komandante Polisia Nasionál Timor-Leste Postu Administrativu Hatolia B informa, ba parte segurante PNTL, nu’udar ajente estadu nian, iha responsabilidade tomak, atu halo seguransa maxímu no halo akompañamentu diariamente ba servisu iha terrenu, hodi garante nafatin ba ezekusaun projetu ida ne’e, laiha komunidade individu balun, halo inpedimentu ba obra ne’e.
Vise-Prezidente Komisaun Ezekutiva BTL, E.P, ba Asuntu Tékniku, Sr. José Filipe Ximenes Smith, agradese ba autoridade no komunidade sira, tamba laiha objesaun kona-bá implementasaun projetu mellroamentu ba sistema bee moos ida ne’e.
“Tamba saida ami persija los halo enkontru ho Administradór, Xefe Suku, Xefe Aldeia, Veteranu no Komunidade sira, mai partisipa sosializasaun ida ne’e, tamba Bee Timor-Leste, Empreza Públika mesak de’it labele, forsa no kbiit la to’o atu implementa obra ne’e, maibé hamutuk maka bele realiza projetu bee ne’e ho susesu”.
Bee Timor-Leste, Empreza Públika iha responsabilidade, atu halo liña kordenasaun no konsulta ho lider lokál, inan no aman sira, nune’e molok dada bee moos, iha postu administrativu hatolia maka autoridade no abitante sira iha sentidu ispritu responsabilidade iha Suku ida ne’e, tamba bele responde povu nia nesesidade bazíka sira.
Vise-Prezidente Komisaun Ezekutiva Bee Timor-Leste, Empreza Públika, ba Asuntu Korporativu hatete, papel autoridade lokál, Polisia Nasionál Timor-Leste, Veteranu no komunidade sira, hodi halo vizilansia no asegura projetu melloramentu sistema bee moos ida ne’e, wainhira implementa ona iha terrenu.
“ita fahe tarefa servisu, Bee Timor-Leste, Empreza Públiku nia partem aka hare liu ba finanseira, maibé autoridade lokál no komunidade sira, maka kontribui maxímu hodi labele akontese problema sosiál no laiha asaun impedimentu.
Hafoin sosializasaun, autoridade lokál no reprezentante administradór mos asina deklarasaun konkordansia ka akta aseitasaun, atu implementa projetu melloramentu sistema bee moos ida ne’e.
Fahe ba Sosial Media:
