𝐃𝐢́𝐥𝐢, 𝟏𝟑 𝐌𝐚𝐫𝐬𝐮 𝟐𝟎𝟐𝟔. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz, hamutuk ho Vise-Prezidente KE BTL, E.P ba Asuntu Tékniku, José Filipe Ximenes Smith no Vise-Prezidente KE BTL, E.P ba Asuntu Korporativu, Manuel Tomas Amaral de Carvalho, akompaña hosi Diretór Administrasaun no Finansas (DAF), Jestora Kontabilidade no Finansas nomos Auditora Interna BTL, E.P nian, hala’o enkontru ho ekipa Auditoria Esterna Decardo 𝑃𝑢𝑏𝑙𝑖𝑐 𝐴𝑐𝑐𝑜𝑢𝑛𝑡𝑎𝑛𝑡 iha sala reuniaun Ezekutivu BTL, E.P sentrál, Caicoli
Auditoria Esterna Decardo 𝑃𝑢𝑏𝑙𝑖𝑐 𝐴𝑐𝑐𝑜𝑢𝑛𝑡𝑎𝑛𝑡 mak halo auditoria ba relatóriu finanseiru BTL, E.P nian ho norma internasionál (International Financial Reporting Standards-IFRS). Nune’e ohin, parte Auditoria Esterna mai aprezenta rezultadu finál auditoria kona-bá relatóriu finanseiru tinan 2025 nian ba BTL, E.P.
Durante iha aprezentasaun ba rezultadu finál ne’e, jeralmente laiha fraude iha BTL, E.P, maibé iha de’it rekomendasaun balun ba empreza públika ne’e, atu bele hadi’a. Hanesan iha prosesu administrasaun no finansas nian, ligadu ho patrimóniu, iha parte lojístika, liu-liu atu tau atensaun kona-bá inventáriu nian.
Rezultadu finál ne’e mos sita kona-bá prosesu dezenvolvimentu iha BTL, E.P la’o di’ak no rekomenda atu halo revizaun ba planu negósiu BTL, E.P nian, tanba planu refere iha mudansa lubuk ida no presiza halo ajustamentu.
Hafoin aprezentasaun ne’e, Prezidente KE BTL, E.P konsidera ida ne’e pozitivu tebes ba BTL, E.P, hanesan empreza públika nia iha obrigasaun administrativa no finanseira ne’ebé tenke halo anualmente, wainhira ezerse ona nia funsaun administrativu. Tanba ne’e, auditoria ne’e ajuda tebes atu haree aportunidade ho dezafiu ne’ebé mak iha nomos rekomendasaun sira ne’ebé auditoria ne’e fó, hodi guia empreza ne’e bele mellora liu tan ninia jestaun iha futuru.
BTL, E.P mos apresia no anota rekomendasaun sira ne’ebé hato’o hosi Auditoria Esterna Decardo 𝑃𝑢𝑏𝑙𝑖𝑐 𝐴𝑐𝑐𝑜𝑢𝑛𝑡𝑎𝑛𝑡, hein katak auditoria ne’e bele tulun BTL, E.P. Alende ne’e, Auditoria Esterna mos sei prepara relatóriu auditoria ba sasan no responsabilidade administrasaun no finanseira nian, hahú hosi loron 01 fulan janeiru to’o loron 31 fulan dezembru tinan 2025 nian, hodi entrega ba BTL, E.P, nune’e bele submete relatóriu auditoria hamutuk ho relatóriu finanseiru BTL, E.P nian ba Governu no kontinua hato’o ba Tribunál Konta (Tribunal de Contas).
Fahe ba Sosial Media:
