𝐃𝐢́𝐥𝐢, 𝐊𝐢𝐧𝐭𝐚-𝐟𝐞𝐢𝐫𝐚 𝟐𝟏 𝐌𝐚𝐢𝐮 𝟐𝟎𝟐𝟔.
Diretór Operasaun no Manutensaun (DOM) BTL, E.P, Aleixo dos Santos no Jestór Distribuisaun, Eduardo Ximenes akompaña hosi tékniku O&M observa liña transmisaun bee ne’ebé afeta hosi projetu alargamentu estrada no konstrusaun valeta, iha Taibessi My Friend, zona 5.
Alende observa kanu kanalizasaun hirak ne’e, Diretór DOM ho Jestór Distribuisaun halo mos koordenasaun ho ekipa MOP no kompañia ne'ebé ezekuta obra estrada no valeta iha Taibessi My Friend, atu bele servisu hamutuk hodi halo intervensaun imediatu ba liña transmisaun ne’ebé afetadu hosi projetu refere, nune’e bele normaliza hikas fornesimentu bee moos ba konsumidór sira.
Hafoin koordenasaun, iha parte dader, tékniku BTL, E.P O&M kontinua kedas muda no reinstala kanu transmisaun ba fatin seguru ou ajusta tuir valeta ninin nomos solda kanu hodi halo koneksaun hosi estasaun bomba Taibessi My Friend ba kanu ne'ebe kanaliza ba ETA Lahane no servisu refere akompaña direta hosi Jestór Distribuisaun.
Kanu transmisaun ne’ebé afeta hosi projetu alargamentu estrada no konstrusaun valeta ne’e ho distánsia metru 300 (300m) no kanu refere mak durante ne’e hodi kanaliza bee hosi estasaun bomba Taibessi My Friend ba tanke rezervatóriu iha ETA Lahane.
Ho estragu ne’e, perturba fornesimentu bee moos ba konsumidór iha área Taibessi nian, tanba ne’e, liuhosi meius komunikasaun ida ne’e, BTL, E.P nafatin informa ba komunidade sira iha área Taibesi tomak ne’ebé mak durante ne’e, asesu bee moos hosi sistema bomba Taibessi My Friend no tanke rezervatóriu Lahane nian katak, abastesimentu bee sei pauza durante loron rua ou tolu, tanba bomba iha estasaun ne’e sei taka provizória, nune’e hodi fó biban ba ekipa BTL, E.P atu hadi’a kanu estragu sira, muda no reinstala liña transmisaun iha área Taibessi.
Ho nune’e, husu ba abitante sira iha Taibessi atu pasiénsia, hodi hein to’o servisu mudansa kanu no reinstalasaun liña transmisaun ne’e finaliza, mak foun bele fornese fila-fali bee moos ba kliente sira.
Fahe ba Sosial Media:
