info@btl.tl 3311539

Vise-Prezidente BTL, E.P Sai Oradór iha Semináriu nomos Partisipa iha Reflesaun ba Komemorasaun Loron Nasionál Juventude no Masakre Santa Cruz nian iha Viqueque

𝐕𝐢𝐪𝐮𝐞𝐪𝐮𝐞, 𝐊𝐮𝐚𝐫𝐭𝐚-𝐟𝐞𝐢𝐫𝐚 𝟏𝟎 𝐍𝐨𝐯𝐞𝐦𝐛𝐫𝐮 𝟐𝟎𝟐𝟔
 
Vise-Prezidente KE BTL, E.P ba Asuntu Korporativu, Manuel Tomás Amaral de Carvalho, sai oradór iha atividade semináriu ba komemorasaun aniversáriu Loron Nasionál Juventude ba dala-XXI nomos Loron Masakre Santa Cruz ba dala-XXXV nian ne’ebé ho tema jerál “𝐻𝑜 𝐸𝑠𝑝𝑖́𝑟𝑖𝑡𝑢 12 𝑁𝑜𝑣𝑒𝑚𝑏𝑟𝑢 𝑛𝑖𝑎𝑛, 𝐿𝑜𝑟𝑖 𝐼𝑡𝑎 𝑏𝑎 𝐻𝑎𝑚𝑢𝑡𝑢𝑘 𝐻𝑎𝑟𝑖𝑖 𝑃𝑎𝑧 𝑛𝑜 𝐴𝑢𝑡𝑜́𝑟 𝑏𝑎 𝐷𝑒𝑧𝑒𝑛𝑣𝑜𝑙𝑣𝑖𝑚𝑒𝑛𝑡𝑢 𝑛𝑒’𝑒𝑏𝑒́ 𝑆𝑢𝑠𝑡𝑒𝑛𝑡𝑎́𝑣𝑒𝑙”. Semináriu ne’e hala’o durante loron rua, iha suku Afaloicai, Munisípiu Viqueque.
 
Ezekutivu BTL, E.P sai oradór hodi partilla ba joven sira kona-bá “Valoriza Unidade Sakrifísiu Loriku As’wain 12 Novembru hodi Hametin Identidade Istória liuhosi Asaun Ativu, Kriativu hodi Hakat Hamutuk ba Futuru”, atu nune’e joven sira bele banati tuir espíritu luta nian no valoriza erói sira-nia luta, hodi kontribui ba paz, serví no dezenvolve nasaun Timor-Leste.
 
Alen de ne’e, iha loron 11, Vise-Prezidente KE BTL, E.P ba Asuntu Korporativu kontinua partisipa iha reflesaun kalan iha suku Bahalarauain, Postu-administrativu Lacluta, hodi hanoin hikas joven rihun resin ne’ebé mate iha Masakre 12 Novembru, hodi fó sira-nia isin hodi liberta pátria no rai TL, iha tinan 35 liu ba.
 
No iha loron 12 fulan novembru nafatin partisipa iha abertura ba eventu natal cup ne’ebé hala'o iha suku Bahalarauain. Realizasaun eventu ne'e, hodi kria amizade no fraternidade iha sosiedade nia leet no festeja hamutuk hodi simu kosok oan iha natal no tinan foun 2027.


Fahe ba Sosial Media: