Bobonaro, 25/08/2023, Prezidente Komisaun Ezekutiva BTL, E.P, Eng. Carlos Peloi dos Reis, akompaña Vise-Prezidente Komisaun Ezekutiva BTL, E.P, ba Asuntu Boa Governasaun no Fortalesimentu Institusional, Diretór Diresaun Engeñaria no Investimentu, Jestór Infraestrutura, Kordenadór BTL, E.P, Hamutuk husi Membru Parlamentu Nasionál, Ezekutivu BTL, E.P, Xefe Gabinete SEEAS, PNTL, Reprezentante Administradór Postu Administrativu Cailaco,, Amo Pároku Cailaco, Veteranu, Autoridade Lokál, parseiru Ajensia Internasionál, Nasionál, komunidade sira no mos partisipante sira seluk, inaugura sistema bee moos, ne’ebé lokaliza iha Postu Administrativu Cailaco Villa.
Iha serimónia ne’e, Prezidente Komisaun Ezekutiva BTL, E.P hatete, BTL, E.P iha polítika klaru atu mellora hotu sistema bee moos, iha kapitál Postu Administrativu sira, ne’ebé laos hola parte kapitál munisípiu nian.
”Karik ita bo’ot sira akompaña prosesu durante ne’e katak, postu 48 maka laos hola parte iha kapitál munisípiu, iha ne’ebé promove ona projetu 34 no hela hela postu 16 maka seidauk konsege lansa. Ho politíka atu liberta povu liu husi setór bee maka BTL, E.P kanaliza bee to’o ba komunidade nia uma, ne’ebé inaugura tiha ona sistema kanalizasaun balun, hanesan iha Suku Mehara no Postu Cailaco”.
Ezekutivu akresenta BTL, E.P tau preoridade ba kapitál postu sira, wainhira remata maka foin hakat ba Suku sira, tenki iha planu no iha tarjetu, nune’e bele dezenvolve lais, hodi lori bee ba komunidade sira iha territóriu nasionál. Alem de Postu Administrativu sira, ba kapitál munisípiu liu husi atu mellora sistema bee moos maka hetan apoia husi ajensia internasionál sira, liu husi orsamentu imprestimu atu bele hadi’a sistema kanalizasaun ho modernu ka digital hanesan iha kapitál munisípiu Baucau, Viqueque, Lautém, Manufahi, dadaun ne’e nia prosesu iha ona Komisaun Nasionál Aprovizionamentu (CNA) atu loke tenderizasaun. Nune’e mos ba Kapitál Díli, ne’ebé fahe ba pakote rua hanesan Díli Leste no Díli Oeste iha ona prosesu halo revizaun ba dezeñu detalladu iha ADN, wainhira revizaun ne’e remata maka sei lori ba prosesu tuir mai.
Prezidente BTL, E.P esplika, ba melloramentu sistema bee moos iha kapitál munisípiu no mos Postu Administrativu sira sei diferente, iha kapitál munisípiu futuru komunidade sei konsumu bee direita husi kanalizasaun, iha postu administrative sira bee to’o uma, maibé persija halo tan tratamentu hanesan nono ka filtru molok konsumu.
Ho melloramentu ba sistema bee moos iha kapitál postu administrativu sira no mos kapitál munisípiu remata, BTL, E.P mos sei rekruta ema hodi bele kontrola ba sistema bee moos refere. Prezidente Komisaun Ezekutivu ne’e mos husu ba komunidade sira, atu kontinua konserva bee hanesan kuda ai, labele sunu rai, hodi labele fo impaktu ba rekursu bee.
Lider BTL, E.P ne’e mos husu ba abitante sira atu kuidadu sistema bee moos, ne’ebé asesu ona, nune’e fo biban ba BTL, E.P atu bele promove projetu ba fatin seluk, ne’ebé komunidade sira seluk seidauk asesu bee.
Xefe Gabinete Sekretáriu Estadu Eletrisidade Água no Saneamentu, Julio Gonçalves hatete, bee nu’udar fonte importante ida ba ema nia moris, tamba ne’e komunidade sira tenki kuida didi’ak fasilidade hirak ne’e, hodi bele utiliza bee ne’e ba tempu naruk.
Xefe Gabinete SEEAS, agradese ba BTL, E.P, ne’ebé servisu di’ak tebes hodi lori bee ba komunidade sira nia leet, iha oportunidade ne’e parabeniza mos ba populasaun sira, kontribuisaun, ne’ebé servisu hamutuk ho BTL, E.P konsege finaliza projetu ne’e.
Benfisiariu João Leto Mali Lopes, orgullu tebes tamba governu liu husi BTL, E.P kria ona kondisaun di’ak ba povu iha baze. Abitante ne’e afirma katak iha tempu pasadu susar tebes asesu bee, wainhira ami atu asesu bee tenki dudu malu, tamba sistema bee antes ne’e la sufisiente, maibé ho mellloramentu sistema bee moos ida ne’ehalo mudansa siknifikativu tebes, hodi halo ligasaun bee direita ba uma kain.
Benefisiariu ne’e mos husu ba BTL, E.P atu halo jestaun bee ho di’ak, abitante ne’e kompremitidu sei kontribui selu tarifa bee moos ba Estadu.
Benefisiariu ba melloramentu sistema bee moos ida ne’e, populasaun 1950 ho uma kain hamutuk 177 inklui ona edifísiu Públiku hanesan Eskola, Postu Administrasaun, Igreja, PNTL no Saúde. Orsamentu ne’ebé finansia ba obra ho pakote rua maka hanesan ba projetu kanalizasaun no metru kontadór $ 226,986.36 no kustu ba installasaun Liner Tank $ 139,445.01, h onia totál hamutuk 366,431.37.
Fahe ba Sosial Media:
