Viqueque, 01-02/03/2023, II Vise-Prezidente Komisaun Ezekutiva (KE), Bee Timor-Leste, Empreza Públika (BTL, E.P), Sra. Elizabeth Amaral, akompaña hosi Diretór Operasionál no Manutensaun (DOM) nomos Jestór hosi Departamentu Apoiu Kliente (DAK), partisipa iha atividade konsultasaun sidadania, entre Governu no Autoridade Lokál sira. Atividade ne’e, realiza hosi VIII Governu liuhosi Ministériu Finansas (MF) ho tema “Konsultasaun Sidadania iha Munisípiu Viqueque”, ne’ebé hala’o iha salaun Administrasaun Munisípiu Viqueque.
Konsultasaun sidadania ne’e esensiál tebes, nudár meius atividade ida ne’ebé konsagra ona iha Lei Enkuadramentu Orsamentál (LEO) nú. 2/2022 atigu 45 alinea D ne’ebé define klaru kona-bá prosesu planeamentu ba orsamentu, presiza inklui mos konsultasaun hosi sidadaun, órgaun soberanu ho entidade setór públiku administrativu sira. VIII Governu Konstitusionál liuhosi MF nudár autoridade ne’ebé mak hala’o konsultasaun sidadania ida ne’e, hamutuk ho MAE nomos ministériu relevantes sira hanesan ME, MS, MAP, MTCI, MOP inklui BTL, E.P no EDTL, E.P ho objetivu atu bele rona diretamente no rekolla informasaun sufisiente, hosi entidade nível sub-nasionál no munisipál iha prosesu elaborasaun planu anuál tinan 2024 no tinan sira tuir mai, atu kontempla iha planu grande opsaun (Grande Opções do Plano).
Iha konsultasaun sidadania ne’e mos, hanesan oportunidade di’ak ida, atu autoridade munisípiu, postu no suku sira, bele fó hanoin, hato’o informasaun prioridade ou preokupasaun ne’ebé mak durante ne’e povu sira enfrenta iha baze, hafoin ekipa integradu sei elabora hamutuk, halo análize no hamosu rekomendasaun sira, atu nune’e bele kontempla iha planu grande opsaun (Grande Opções do Plano), iha tinan 2024, nune’e hodi aprezenta ba Konsellu Ministru (KM) iha fulan marsu hafoin sei lori ba Parlamentu Nasionál (PN) iha fulan Abril.
Iha atividade konsultasaun sidadania iha Viqueque ne’e, II Vise-Prezidente KE BTL, E.P halo introdusaun liga ba aprezentasaun BTL, E.P nian, liu-liu papel no progresu ne'ebé atinji ona durante ezisténsia Empreza Públika ne'e. Tanba ne'e, II Vise-Prezidente KE BTL, E.P husu ba partisipante sira atu tau atensaun, nune'e hafoin aprezentasaun bele fó hanoin ruma, hodi apoia BTL, E.P atu halo planu ne'ebé di'ak liu tan, iha tinan oin. Alende introdusaun badak hosi II Vise-Prezidente BTL, E.P nian, Diretór DOM BTL, E.P kontinua kedas halo aprezentasaun kona-bá servisu téknika sira relasiona ho “Bee no Saneamentu iha ne'ebe foku liu ba prioridades no alvu sira inklui rezultadu atinjidu”.
Iha aprezentasaun ne’e, Diretór DOM BTL, E.P esplika kona-bá servisu téknika sira, Misaun no Vizaun BTL, E.P nian nomos progresu servisu balun ne’ebé durante ne’e BTL, E.P atinji ona, katak durante ezisténsia BTL, E.P, konsege promove ona projetu sistema bee moos foun lubuk ida, iha kapitál munisípiu no postu-administrativu inklui suku balun, iha territóriu nasionál. Alende ne’e, relata mos projetu balun ne’ebé transfere hosi DGAS nian, ne’ebé seidauk finaliza, nune’e BTL, E.P kontinua hala’o projetu hirak ne’e.
Enkuantu iha atividade konsultasaun ne’e, iha mos aprezentasaun hosi ministériu relevante sira, inklui BTL, E.P no EDTL, E.P. Entidade ne’ebé partisipa iha atividade konsultasaun ne’e mai hosi liña ministeriál sira, autoridade munisípiu, postu no lideransa suku.
Fahe ba Sosial Media:
