Díli, 03/03/2023, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis, partisipa iha seremónia Komemorasaun Loron Nasionál Veteranu nian, ba Dala-6, ne’ebé realiza iha Palásiu Governu.
Komemorasaun Loron Nasionál Veteranu ba tinan ida ne’e, ho tema, “Hametin Unidade ba Dezenvolvimentu Nasionál”. Nudár jestu ida atu prezerva kultura, istória kona-bá rezisténsia no fó omenajen ba erói sira hotu.
Iha diskursu Prezidente Parlamentu Nasionál (PPN), Aniceto Longuinhos Guterres Lopes hatete, iha komemorasaun Loron Nasionál ba Veteranu iha tinan ida ne’e, hodi hanoin hikas Timor-Leste nia erói no Mártires da Pátria. No atu hanoin hikas mos valores, unidade, dedikasaun, abnegasaun no sakrifísiu ne’ebé lori timoroan hotu, hodi konkista libertasaun no independénsia nasionál. Loron ida ne’e mos, sai loron istóriku ida iha prosesu libertasaun pátria ne’ebé hatutan libertasaun totál no kompleta. Veteranu mak sai ezemplár ba jerasaun foun sira, nune’e komemorasaun loron veteranu ne’e, fanun timoroan hotu, liu-liu foinsa’e sira atu banati tuir valór veteran sira nian.
Enkuantu seremónia ba tinan ida ne’e, Prezidente PN reprezenta Prezidente Repúblika (PR), José Ramos Horta, hodi prezide seremónia komemorasaun loron nasionál veteranu ba dala-6 nian. No entidade sira ne’ebé partisipa iha seremónia ne’e mak Prezidente Tribunál Rekursu (PTR), Xefe Estadu Maiór Jenerál FALINTIL-Forsa Defeza Timor-Leste (F-FDTL), Komandante Jerál Polísia Nasionál Timor-Leste (PNTL), Eis-Titulares Estadu, membru PN, membru Governu, Korpu Diplamátiku no konvidadus sira seluk.
Hafoin remata seremónia isar Bandeira, kontinua kedas ho marsa Veteranu ne’ebé hahú hosi Palásiu Governu to’o Sentru Konvensoens Díli (CCD; sigla portugés).
Fahe ba Sosial Media:
