Liquiça, 10/03/2023, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis, partisipa iha seremónia lansamentu ba projetu Melloramentu kona-bá Jestaun Aterru Kontroladu iha Tibar.
Seremónia lansamentu ne’e, organiza liuhosi koordenasaun entre MAE ho AMD no lansa hosi S.E Ministru Administrasaun Estatál (MAE), Miguel Pereira de Carvalho, ne’ebé reprezenta S.E Primeiru Ministru (PM), Taur Matan Ruak.
Iha intervensaun, S.E Ministru MAE hatete, komunidade sira iha sidade Díli, iha tinan kotuk, loron ida produz lixu toneladas 220 no tinan ida ne’e, aumenta ba toneladas 230. Hosi totál lixu hirak ne’e, pursentu 55 (55%) de’it mak lori mai soe iha Tibar no pursentu 45 (45%) mak soe namkari iha kapitál Díli, hanesan soe iha valeta laran, tasi, lixu balun sunu ou hakoi. Ho problema ne’e mak kompromisu VIII Governu Konstitusionál nian, atu fó solusaun ba problema lixu ne’ebé komunidade kapitál Díli no fatin sira seluk enfrenta durante ne’e. Tanba ne’e, ho lansamentu fatuk dahuluk ba projetu jestaun ba rekualifikasaun aterru kontroladu iha Tibar ne’e, bele solusiona kestaun lixu no nudár marka importante ida ba MAE ho kompromisu ida katak hodi fó protesaun ba ambiente nomos ba saúde públika.
Lansamentu ne’e, hodi transforma lixeira Tibar ne’e rasik ba iha forma aterru kontroladu, nune’e bele halakon ahi suar, iis, fo’er no lalar hosi komunidade sira iha Tibar ne’ebé durante tinan barak enfrenta problema refere.
Iha biban ne’e, liuhosi intervensaun S.E Sekretáriu Estadu Ambiente (SEA) hatete, Konstrusaun dahuluk aterru sanitáriu/ landfill ida ne’e sai marka importante ba TL, tanba sei fó solusaun ba redusaun lixu no kontribui hamenus kestaun lixu ne’ebé tinan barak nia laran sai problema sentrál iha munisípui Díli nomos sei fó solusaun ba problema ambiente ne’ebé liga ho lixu no poluisaun, hein katak loron 100 ba oin, bele kombate ona suar no lalar iha lixeira Tibar.
Enkuantu orsamente ne’ebé prevé ba projetu Melloramentu kona-bá Jestaun Aterru Kontroladu iha Tibar ne’e, mai hosi Fundu Infraestrutura.
Entidade sira ne’ebé partisipa iha atividade lansamentu ne’e, mai hosi MAE, SEA, BTL, E.P, ANAS, I.P, EDTL, E.P, Prezidente AMD, Reprezentante hosi ADB, Embaixada China iha TL, Autoridade munisípiu Liquiça, Ermera, Baucau, líder komunitária, parte seguransa PNTL, komunidade no konvidadu sira seluk.
Fahe ba Sosial Media:
