Díli, 28/06/2022. Prezidente Komisaun Ezekutiva BTL, E.P, Eng. Carlos Peloi dos Reis, akompaña husi Diretór D.E.I, Diretór D.O.M no ekipa hala’o enkontru ho ekipa husi parseiru Ajénsia JICA, iha salaun enkontru, edifísiu sentrál BTL, E.P, Caicoli.
Objetivu husi enkontru ne’e mak hodi ko’alia kona-bá progresu servisu balun no oinsá atu hadi’a liu tan servisu hirak ne’ebé identifika seidauk máximu, hanesan melloramentu sistema bee moos, nomos kontinuasaun ba kooperasaun servisu entre BTL, E.P ho JICA hodi maximiza liu tan servisu iha futuru, liu-liu kona-bá melloramentu sistema bee moos, iha kapitál Díli.
Durante enkontru , JICA hato’o mos input no fó hanoin no sujestaun balun, relasiona ho servisu hirak ne’ebé presiza hadi’a, hanesan melloramentu ba sistema bee moos, halo sosializasaun ba asuntu sira hanesan, koneksaun ilegál, aplikasaun tabela tarifária (aplika selu tarifa) ba kliente sira, nune'e bele aumenta númeru kliente selu taxa bee moos nian, instalasaun metru kontadór ba konsumidór sira ne’ebé seidauk iha metru kontadór no kapasitasaun rekursu umanu, liu-liu ba tékniku operadór sira, maske tékniku sira iha ona kapasidade ba área tékniku nian, maibé presiza aumenta liu tan sira-nia koñesimentu, presiza hadi’a sistema distribuisaun sira, hanesan kanu kuak, no ligasaun illegal ne'ebé sei nafatin eziste.
Alein ne’e, kooperasaun servisu entre JICA ho BTL, E.P kona-bá sistema bee moos nian, JICA halo mós monitorizasaun ba servisu hotu ne’ebé mak la’o ona durante ne’e, hafoin hato’o ba BTL, E.P oinsa bele hadi’a no JICA nafatin apoiu BTL, E.P kona-bá melloramentu sistema bee moos, hodi oferese bee durante 24 oras ba komunidade sira, iha kapitál Díli.
Iha biban ne’e, Prezidente K.E BTL, E.P apresia tebes ba JICA nia apoiu ba BTL, E.P no simu rekomendasaun sira ne’ebé JICA hato’o ba BTL, E.P, hodi hadi’a di'ak liu tan servisu ne'ebé la'o ona no servisu hirak ne'ebé seidauk realiza.
Nomós ba parte Departamentu Apoiu Kliente (D.A.K) no Diresaun Operasionál no Manutensaun (D.O.M) presiza servisu iha ekipa hodi hadi’a di’ak liu tan sistema servisu hirak ne’e ba oin, liu-liu kona-bá melloramentu sistema bee moos no aumenta númeru kliente ba selu tarifa hafoin konsumidór sira asesu bee ne'ebé kanaliza husi BTL, E.P.
Antes ne’e, JICA mos sujere ona hodi estabelese ekipa Task Force, atu reforsa servisu ekipa tékniku operadór sira nian, iha terrenu.
Fahe ba Sosial Media:
