Baucau, 27/01/2024, Prezidente Komisaun Ezekutiva BTL, E.P, Eng. Carlos Peloi dos Reis, akompaña husi Diretór DEI BTL, E.P, Jestór Infraestrutura BTL, E.P, Prezidente Fiskál ho membru, Kordenadór BTL, E.P Baucau, Kordenadór BTL, E.P Manatutu ho ekipa, nune’e mos partisipa Vise-Ministru Infraestruta, Júlio do Carmo, Reprezentante SEEAS, Admministradora PA Vemasse, Segundu Komandante PNTL Munisípiu Baucau, Autoridade Lokál no Komunidade sira, ofisialmente inaugura ona sistema bee moos, ne’ebé lokaliza iha Postu Administrativu Vemasse.
Iha serimonónia inaugurasaun ne’e, Prezidente BTL, E.P partilla informasaun relasiona ho servisu BTL, E.P nian durante ne’e ba komunidade sira iha Vemasse katak, durante ne’e BTL, E.P lansa ona projetu sistema bee moos iha postu Administrativu rua nulu resin rua, ne’ebé la’o hela iha terrenu iha terrenu, husi númeru ne’e konsege inaugura ona tolu, maka hanesan iha Suku Mehara, Postu Administrativu Tutuala, Munisípiu Lautém, Postu Administrativu Cailaco, Munisípiu Bobonaro no Postu Administrativu Vemasse maka bad á-toluk nian, espera iha postu seluk bele aselera servisu nafatin, hodi bele inaugura tan iha tempu badak nia laran, atu bele fornese ba komunidade sira.Alem de ne’e Projetu ba Postu Administrativu 15 maka iha hela prosesu aprovizionamentu no postu sira seluk iha hela elaborasaun dezeñu detalladu.
Iha biban ne’e mos Prezidente KE BTL, E.P agredese ba Autoridade lokál, Veteranu/a, autoridade seguransa no komunidade sira nia kontribuisaun tomak, ne’ebé servisu hamutuk no kopera di’ak tebes, hodi bele finaliza projetu ne’e.
Tamba ne’e, fo mensagen ba populasaun sira, atu bele kontinua kontribui, liu husi kuda ai oan, labele tesi ai no labele sunu rai, hodi bele asegura nafatin rekursu bee iha rai okos no mos rai leten. Prezidente mos husu abitante sira atu kontinua asegura fasilidade sira, ne’ebé BTL, E.P installa ona, hodi nune’e bele fo biban ba BTL, E.P bele tau matan fila fali ba komunidade sira iha fatin seluk, ne’ebé seidauk asesu bee moos.
Iha fatin hanesan, Administradora Postu Administrativu Vemasse, Elda Maria de Sousa agradese ba governu sentrál, liu-liu BTL, E.P, tamba bele kanaliza ona sistema bee moos ba postu ida ne’e. Autoridade ne’e mos alerta ba komunidade sira, atu bele kuidadu nafatin sistema bee ida ne’e, ba tempu naruk.
Iha sorin seluk, Vise-Ministru Infraestrutura, Júlio do Carmo hatete, governu iha politíka tau preoridade nafatin bai ha setór bee no saneamentu ba populasaun hirak, ne’ebé seidauk asesu bee. Vise-Ministru mos husu ba komunidade sira atu utiliza bee ida ne’e ba nesesidade loron-loron.
Projetu ida ne’e, implementa husi kompañia rua maka hanesan, kompañia Karisma Unip Lda, kanaliza bee, installa metru kontadór, halo manutensaun ba perfurasaun bee no pakote Supply & Instalation of Fabricated ho nia orsamentu hamutuk dollar amerikanu $ 538,636.44.
Projetu sistema bee moos ida ne’e benefisia ba uma kain atus haat ualu (408) ho nia populasaun rihun tolu no mos kanaliza bee ba fasilidade públiku sira, hanesan Administrasaun, Saúde, Eskola, Igreja no edifísiu PNTL.
Fahe ba Sosial Media:
