Díli, 02/03/2023, Ekipa hosi Diresaun Enjeñaria no Investimentu (DEI), Departamentu Infraestrutura, Bee Timor-Leste, Empreza Públika (BTL, E.P) ohin monitorizasaun ba obra fíziku kona-bá Projetu Konstrusaun Sistema Bee Moos no Supply & Installation Liner Tank, Instalasaun Kanu Transmisaun no Distribuisaun, inklui monta rede protesaun tanke, ne’ebé servisu fíziku la’o hela, iha suku Vila Verde, postu-administrativu Vera Cruz, munisípiu Díli.
Objetivu hosi monitorizasaun ne’e, hodi observa direta progresu servisu fíziku ne’ebé la’o hela iha terrenu, atu bele garante kualidade projetu ne’e rasik, nune’e wainhira obra refere finaliza, komunidade sira bele utiliza to’o tempu naruk.
Tuir ekipa monitorizasaun katak, projetu fíziku daudaun ne’e, foin atinji pursentu tolu (3%).
Projetu refere implementa hosi kompañia Arlei Henlice Unipessoal Lda, ho durasaun tempu fulan neen. Orsamentu ne’ebé gasta ba projetu ne'e hamutuk $ 86,392.40.
Alende ne’e, Sistema Bee Moos ne’ebé sei kanaliza ba komunidade sira ne’e, mai hosi sistema bomba ne’ebé nia perfurasaun finaliza ona. No perfurasaun bomba refere nia fundus mai hosi liña ministeriál sira no orsamentu ba konstrusaun moru protesaun iha bomba ne’e rasik, mai hosi Fundus Infraestrutura. Ho nune’e, kompañia sei utiliza bomba refere, hodi kanaliza ba komunidade sira iha suku Villa Verde.
Projetu Pakote Konstrusaun Sistema Bee Moos ne’e, sei benefisia ba komunidade uma kain rihun tolu resin ho nia populasaun 15.344, ne’ebé mai hosi aldeia sia hanesan Guideon, Lemorai, Matua, Mate Moris, Mate Resto, Nopen, Terus Nain, 01 de Setembro no Virgolosa, suku Villa Verde, postu-administrativu Vera Cruz, munisípiu Díli.
Fahe ba Sosial Media:
